"خصمي غرفة صناعة السينما".. مخرج فيلم اختيار مريم يناشد رئيس الجمهورية
خرج المخرج محمود يحيي عن صمته ليناشد رئيس الجمهورية عبدالفتاح السيسي، بسبب منع عرضه فيلمه الروائي اختيار مريم، وذلك من خلال مقطع فيديو عبر حسابه الرسمي على موقع التواصل الإجتماعي فيسبوك.
المخرج محمود يحيي يناشد الرئيس السيسي
حيث قال محمود يحيي: “أنا محمود يحيي عبدالسلام سيناريست ومخرج ومنتج وصاحب شركة إنتاج في غرفة صناعة السينما، طبعا أي حد هيسمع الكلام ده هيفتكر أني ياما هنا ياما هناك، لكن واقع الحال أني عايش على البلاط، وأنا مش طالع اتسول أو بطلب حسنة، أنا مش طالب أكتر من حقي القانوني والدستوري، أول مطلب هو مطلب حق الأداء العلني والمطلب الثاني هو مطلب شخصي وهو مطلب مشروع وهو عرض استثماري لفيلمي الروائي الأول اللي حطيت فيه كل فلوسي، وهو فيلم اختيار مريم أنا بناشدك يا سيارة الريس أنك تحمي مستقبلي وتحمي استثماري، لأن في ناس متسلطين عليا مش هدفهم أن الناس تاخد حقوقهم، الخصم في الحالتين هو غرفة صناعة السينما، اللي المفروض تدعم ريادة أعمال السينما، هما منعوا التعامل مع الفيلم أو دعمه وواقفين ضدي”.
أزمة عدم نشر فيلم اختيار مريم
واستكمل محمود يحيي حديثه: “من وأنا صغير بحلم بالسينما ولما جيت مصر مكنتش فاكر أن حلم السينما كبير عليا كده دخلت معهد السينما العالي وكنا مسمينه معبد السينما العائلي لأنه كله عائلات وكله شلل، أنا شخص ناجح وكنت بقبض في الشهر 1200 دولار مين في مصر دلوقتي شاب بيقبض القبض ده وكنت بصرف 100ج يوميًا وأحوش الباقي عشان حلمي، أنا عملت بنصيحتك يا سيادة الريس واشتغلت، لما جيت للعرض التجاري زيي زي أي منتج سينمائي، روحت للقطاع الخاص قالولي مالكش عندنا حقوق عرض وروح لوزارة الثقافة، روحت قعدت مع وزير الثقافة والمشكلة متحلتش، العقبة اللي واقفة في طريقي هي غرفة صناعة السينما، لما قولت هروح للقضاء لأن عندي مشكلة مع الموزع السابق هددوني زي المافيا وقالولي لو روحت للقضاء هنمنعلك الفيلم، وقد كان لأني تمسكت بحقي، اللي زيي في أمريكا بيسموهم رواد أعمال، كله هنا إيده مرتعشة أزاي الأيد المرتعشة تبني صناعة السينما صناعة استيراد يعني تجبلنا دولارات، انظر لصناعة السينما ده مطلب عام”.
