ياسمين عز: الكيمياء غدارة زي الرجالة بس اجمدي يا شيماء ده ملحق مش حوار
قالت الإعلامية ياسمين عز: «امتحان الثانوية العامة الصبح.. بتوع الكيمياء بيعيطوا ومنهارين وبتوع الجغرافيا مزقطتين وبيشكروا الوزير طول عمرنا عارفين إن الكيمياء غدارة وملهاش أمان زي الرجالة والجغرافيا سهلة اصل الجغرافيا بتاعتنا الكيمياء مش بتاعتنا».
وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «في ٥ الحالات تعرضوا للإغماء واتنقلوا المستشفى أمال لما تتجوزي هتعملي ايه اجمدي ده ملحق مش حوار أمال لما تولدي هتعمل إيه.. ورسالة لوليات الأمور لو بتقفي لجوزك على باب الشغل ماسكه عمود الأكل زي ما بتعملي مع عيالك مكانش حد اتطلق في مصر أنت واقفة قدام اللجنة يعني حضرتك هتساعدي بنتك في الكيمياء إزاي ولاحضورك في الجغرافيا هيساعدها إزاي هتطلعي بدور تاني على السد العالي بنتك هي اللي هتجيبلك الدور التاني اقعدي في بيتك اللي ذاكر ذاكر».
وتابعت: «ولا اللي قاعده معاها ورد النمرة غلط القاعة جنبنا مش هنا دي لجنة امتحان هاتي لبنتك عصير قصب ولا ساندوتش كريب بالموز».
وفي سياق سابق، وجهت الإعلامية ياسمين عز مجموعه من النصائح للزوجات المصريات من أجل مباراة مصر وإيران غدا في كأس العالم، قائلة: «هتلاقوا أجوازاتكم كلكم بتتفرج عليه فنصايحي ليكي أولا عايزة تفرحي جوزك فرحة العمر قبل الفجر خدي إسدالك ولمي عزالك ولمي عيالك سلاحف النينجا وروحي عند أهلك سيبيله البيت يتفرج براحته».
وأضافت، خلال تقديمها برنامج «كلام الناس» المذاع على قناة إم بي سي مصر، «لو عملتي اللي بقولك عليه أقسملك هيتبسط وهيدعيلك وهيفضل شايلهالك العمر كله أكتر من الشبكة اللي بعتيها عشانه مش بعيد ترجعي تلاقيه متجوز».
وتابعت: «أصلا بهزر معاكي جوزك ممعهوش فلوس يتجوز أصلا أخره يتفرج على ماتش أما ثانيا لو عايزة جوزك يقعد جمبك ويتفرج على الماتش وماينزلش الفجرية ادفعيله الاشتراك بيعي غويشة ولا اتنين من دهبك ولا بيعي دبلتك لو لسه موجودة أو بيعي حلقك الحمصه عشان تعمليله الاشتراك يقعد جمبك يتفرج تتونسي بيه ويتونس بيكي وأهو يلاقي حد يفش غله فيه لو المنتخب خسر لا قدر الله فالك في وشك».
