عبلة سلامة: "اللي بيحصل مع هند صبري حملة ممنهجة مش مفهومة"
أثارت الإعلامية عبلة سلامة الجدل بعدما دخلت على خط أزمة الفنانة هند صبري، وكشفت أن ما تمر به الفنانة هو حملة ممنهجة ضدها غير معروف سببها، وذلك من خلال منشور عبر حسابها الرسمي على موقع تبادل الصو روالفيديوهات إنستجرام.
حملة ممنهجة ضد هند صبري بعد أزمتها مع مها نصار
وقالت عبلة سلامة في منشور لها: “أنا بجد مستغربة، مستغربة من إمتى بقينا بنستخدم جملة “دي مش مصرية” كأنها تهمة؟، مصر عمرها ما كانت كده. مصر كانت دايمًا بيت وحضن، مش سؤال جنسية؟!!، الفن في مصر شارك فيه ناس جاية من كل مكان في الوطن العربي، عاشوا هنا، اشتغلوا هنا، حبوا البلد دي بجد، ومحدش في يوم قال لهم: إرجع بلدك، انت مش مصري!!، اللي بيحصل مع هند صبري حملة ممنهجة مش مفهومة! هند عمرها ما قالت كلمة واحدة فيها اساء لمصر أو لشعبها، في أحيان كثيرة بأحس أنها بتحب مصر أكتر مننا، في قلب هند مصر وتونس واحد، والأغرب إن الناس اللي في الشارع، مش كده، واللي بييجي مصر من برّه دايمًا يقول كلام يفرّح عن الشعب قبل البلد، اختيار إنك في الآخر تقول “هي تونسية” وكأنها آخر كارت في الجدال، ده اختيار غريب قوي وسخيف ومهين إحنا من إمتى بنعمل كده؟”.
تاريخ هند صبري في الدراما والسينما يشهد لها
واستكملت عبلة سلامة حديثها عن هند صبري قائلة: “هند عاشت في مصر، اشتغلت في مصر، نجحت في مصر، بيتها هنا، حياتها هنا، وبناتها مصريين وجوزها مصري !، وفي نفس الوقت؟ طبيعي جدًا، ومُش عيب، إنها تفتخر بتونس وانتماؤها الأول، الحب مش قسمة، والانتماء مش خصم، أنا كبرت في بلد -مصر- اتعلمت فيها ان الفن عمره ما عرف حدود.ومطربين ومطربات وممثلين وممثلات عاشوا بينا ونجحوا وسطنا وارتبطوا بيهم وعمرنا ما عرفنا أنهم مش مصريين، وقبل ما ننسى التاريخ نفسه شاهد، اللي بيحصل ده مش مصر اللي نعرفها، ولا دي أخلاقها، ومش دي روحها، كفاية تكسير في قوتنا الناعمة، مين وراء حملات الهجوم المستمرة علي نجماتنا ؟!!”.
