«مينفعش تغني غير شعبي».. لماذا أبكى هاني مهنا شيرين عبد الوهاب في بدايتها؟
حل الموسيقار الكبير هاني مهنا ضيفا مع الإعلامية ياسمين عز في برنامج «كلام الناس» المذاع على شاشة mbc مصر، كاشفا عن علاقته بالنجمة شيرين عبد الوهاب في بدايتها الفنية، موضحا حقيقة قسوته في الحكم على صوتها.
بكاء شيرين عبد الوهاب
وردا على سؤال ياسمين عز حول تسببه في بكاء شيرين قديما حين نصحها بالغناء الشعبي فقط، قال هاني مهنا: «شيرين جاتلي هي وسعيد الأرتيست، فسمعتني صوتها، سمعتني يومها عيون القلب لنجاة.. عيون القلب أنا مسجلها مع نجاة، ونجاة عبارة عن صوت لؤلؤة، غلط إنك تسرحي ثانية وإنتي بتسمعيها، لازم تركزي معاها أوي عشان تعيشي المود بتاع نجاة الصغيرة».
وتابع: «عشان كدة لما سمعت شيرين، قلت لها بصي إنتي المفروض صوتك حلو أوي في الشعبي.. وأنا بالعكس، كلمة شعبي دي مش تقليل من قدرها، ده بالعكس، الصوت اللي بيقدر يغني شعبي بيوصل للناس من الطبقة البسيطة لحد الـ Top، أكتر من الصوت الفئوي مثلا.. فمش تقليل من قدرها».
آه يا ليل
وأكمل: «هي زعلت وعيطت وبتاع، إنما بعد كدة أول ما غنت آه يا ليل، قابلتها وقولتها شوفتي؟.. آه يا ليل دي شعبية خلي بالك.. بس، واتصالحنا بعدها».
مقارنة عمرو دياب بـ عبد الحليم حافظ
وحول من يشبه من المطربيين الحاليين بـ عمالقة الماضي، اختار هاني مهنا الفنان عمرو دياب ليشبهه بالعندليب عبد الحليم حافظ، قائلا: «فيه عمرو دياب.. بيفكرني بعبد الحليم حافظ، هو ذكي، عمرو مش مطرب.. إنما ذكي جدا ما شاء الله، بيكمل النواقص الفنية اللي المفروض تبقى في المطرب»، لافتا إلى أن هذا هو ما جعله يتربع على القمة لأكثر من 30 عاما.
لماذا لا يصنف الهضبة كمطرب؟
وردا على سؤال ياسمين عز حول استياء جمهور عمرو دياب من وصفه بأنه ليس مطربا، شرح مهنا وجهة نظره الموسيقية قائلا: «عمرو فنان ذكي جدا، بيعوض النقص الفني اللي في صوته بالذكاء، مش غلط.. أنا مش بقلل منه بالعكس، عمرو من النجوم اللي بيعيشوا كتير، شوف بقاله كام سنة، وفي نفس الوقت جمهوره ميزعلش لما أقول مش مطرب.. كلمة مطرب دي معناها اللي بيرتجل، وبعدين لما بيرتجل بتقولي له الله.. يعني بيقول قفلة موسيقية بصوته، فيه عربة كدة».
