ياسمين عز بعد ارتفاع الذهب: «بيع شبكة مراتك.. بقى معاك ثروة تنافس بيها ساويرس»
تحدثت الإعلامية ياسمين عز خلال برنامجها «كلام الناس»، عن الارتفاعات الكبيرة في أسعار الذهب، قائلة: «الذهب وصل لـ8000 جنيه.. قوم بيّع مراتك شبكتها قوم.. مراتك زهرة اللوتس لابسة ثروة تنافس بيها سميح ساويرس وأنت مش حاسس».
شبكة الزوجة ثروة
وأضافت ياسمين عز: «لو متجوز بدبلة ومحبس وسلسلة وانسيال بوزن 24 جرام.. هيبقى معانا حوالي 192 الف جنيه.. غير الغويشة اللي متجوزاك بيها، والغويشة اللي حماك هداها بيها.. ىيعني أنت معاك ثروة تحتكم عليها وانت كده راجل غني».
ووجهت ياسمين رسالة لمن يشعر بالندم لعدم شراء الذهب عندما كان سعره 3000 جنيه، قائلة: «بعد ما الدهب عدى الـ8000، متضايقش إنك مستثمرتش في الدهب.. مش عاوزاك تندم وتقول ده كان بـ 3000 جنيه..عارف مش عايزاك تندم ليه؟ عشان إنت اصلا مكنش معاك فلوس».
وفي سياق آخر، وجهت الإعلامية ياسمين عز مجموعة من النصائح للزوجات تزامنا مع موجة البرد التي تشهدها البلاد حاليا، مؤكدة على ضرورة تضحية الزوجة بدفئها في سبيل راحة زوجها، وذلك خلال برنامجها «كلام الناس» المذاع عبر شاشة «MBC مصر».
الجو صهد زمهرير صقيع
ووصفت ياسمين عز حالة الطقس الحالية قائلة: «الجو يا جماعة برد اليومين دول.. الجو برد صهد زمهرير ورياح وصقيع، مسمعش واحدة ست تقول لجوزها قوم استحمى.. الزوجة الأصيلة لازم تستحمى بدل جوزها في الشتا وتخليه هو مدفي.. أمال انتي دورك إيه في الحياة كزوجة؟.. انتي تسقعي وهو يدفي».
كوباية الماية واللحاف
وتابعت ياسمين عز: «متسيبيهوش يغسل كوباية.. انتي اغسليها ونشفيها ومش بس كدة، متدلوش الكوباية ساقعة لا، تفضلي تنفخي فيها لحد ما تسخن وتبقى دافية بعدين تديهاله»، مواصلة: «الزوجة الأصيلة تسيب اللحاف كله لجوزها يتغطى بيه ويتكلفت، انتي شوفيلك ملاية أو نامي لابسة تقيل وخلاص».
انتي مش أم كلثوم
واعتبرت ياسمين أن مرض الزوجة بسبب البرد شرفا، قائلة: «ولو بردتي وانتي نايمة أو صحيتي عندك برد كفاية فخر إنك بردتي في سبيل دفا جوزك أبو عيالك.. صوتك يروح مش مهم انتي مش أم كلثوم يا مدام».
