اهتميت بقضايا الأطفال بسبب ضعف سمع بنتي والدراما مش كفايا للكلام عنهم .. أبرز تصريحات يسرا اللوزي في ندوتها بمهرجان المنصورة
حصلت الفنانة يسرا اللوزي على تكريم من مهرجان المنصورة لسينما الأطفال في دورته الأولى، وتحدثت في ندوة تكريمها التي احتضنها نادي جزيرة الورد بمحافظة الدقهلية، عن مشاكل الأطفال وقضاياهم الهامة، مستشهدة بأزمة ضعف سمع بنتها.
وقالت يسرا اللوزي : "كنت زمان أعرف إن فيه مهرجان في القاهرة لسينما الأطفال، وبعد كده اختفى، وكنت زعلانة أوي، ولما اتعمل مهرجان المنصورة لسينما الأطفال فرحت، وخصوصًا إنه في المنصورة كمان بعيدًا عن القاهرة، لأن الفنون مش لازم تكون فيها بس".
وتابعت يسرا : "قبل ما أعرف إن بنتي عندها مشكلة في السمع، ماكنتش مهتمة أوي بقضايا الأطفال، لكن حسيت إن الأطفال دول حاجة هشة ولازم نهتم بيهم، ولما حصل موضوع بنتي وضعف السمع، حسيت إني لازم أستغل فرصة إني نجمة ومشهورة عشان أتكلم عن الموضوع ده".
وأضافت يسرا اللوزي مؤكدة أنها شعرت بأن من واجبها، باعتبارها شخصية عامة، مشاركة تجربتها مع ابنتها، خاصة أنها في البداية لم تجد من يطمئنها بشأن حالتها، قائلة إنها بعدما تجاوزت هذه المرحلة واستعادت توازنها، قررت أن تنقل تجربتها للآخرين وتطمئن الأسر التي تمر بتجربة مشابهة.
وواصلت اللوزي : "لازم الأمهات تعمل كشف سمعي للأطفال بعد الولادة، لأن الاكتشاف المبكر للمشكلة بيبقى خطوة مهمة في التعامل معاها، وبيساعد على التدخل في الوقت المناسب".
وعن دور الدراما التلفزيونية بشأن مشاكل الأطفال، قالت يسرا اللوزي : "مؤخرًا الدراما التليفزيونية بقت تهتم بقضايا الأطفال، بس الدراما لوحدها مش كفاية إنها تتكلم عن الأطفال، لازم يبقى في توعية للأمهات عشان يساعدوهم في التربية، وكمان بحس إن دور المدرسة مهم".
واختتمت يسرا : "موضوع اللغة العربية مهم وبقى شائك الفترة الأخيرة، والجيل الصغير مبقاش يعرف يقول جملة واحدة كاملة بلغة واحدة، وبزعل أوي لما بشوف ناس بتكتب أخطاء في الكتابة".
