طبيبة نفسية: العنف وتبلد المشاعر بسبب السوشيال ميديا وراء الجرائم البشعة

حذرت د. منال عمر أستاذة الطب النفسي من خطورة تكرار عرض مشاهد العنف عبر السوشيال ميديا ووسائل الإعلام مؤكدة أنها السبب الرئيسي وراء انتشار الجرائم البشعة في المجتمع مؤخرا، كما أشارت إلى أن التعرض المستمر لهذه المشاهد يصنع جيلا غير قادر على التعاطف مع الضحايا.

«اعتياد العنف» يقتل الإحساس

وقالت د. منال خلال مداخلة ببرنامج "الستات" إن تكرار مشاهد العنف على السوشيال ميديا والأخبار يؤدي إلى ما نسميه اعتياد العنف وتبلد وجداني «والمشهد اللي كان يصدمك من 10 سنين النهاردة بتشوفه وتقلب الصفحة عادي لأن العقل والوجدان خلاص اتعودوا»، وأضافت أنه «لما تتفرج مرة يطلعلك 10 زيها وبعد 100 مرة الإحساس بيموت ونوصل لمرحلة 'مش مهم' خلاص شفناه قبل كده».

انهيار منظومة القيم

وأوضحت د. منال أن السبب يعود إلى «انهيار منظومة القيم» وتابعت أن «المشكلة بدأت لما قيمة الشخص وقيمة القانون وقيمة المعلم والأم والأب اختفت ولما الشخص ما بقاش شايف قيمة للي قدامه بيقدر يمارس عليه أقصى درجات العنف وهو متصور إنه عادي»، واستطردت قائلة إن «القانون والدين كانوا زمان خط أحمر لكن دلوقتي للأسف بقى ليهم وزن أقل عند ناس كتير بتاخد غضبها لآخر مدى ومش بتعرف تعمل كنترول».

البداية من الطفولة والسوشيال ميديا

وفي السياق ذاته أكدت أن «اعتياد العنف» يبدأ من الطفولة ومن الإهانة والتنمر، متابعة: «لما الطفل يتعود يتقاله يا حمار هيقولها لزميله وبعدين للمدرس وبعدين للكبار»، كما حملت المحتوى المتداول على الإنترنت مسؤولية كبيرة وقالت «اللي بنشوفه في الحروب والصراعات بيخلينا نعتاد الدم والسوشيال ميديا بتطلعلك 10 فيديوهات شبه بعض فبتوصل للتبلد».

نقاش مجتمعي وترسيخ القيم

وختمت د. منال بالتأكيد على أن الحل يبدأ من البيت والمدرسة مشددة على ضرورة أن "نرجع نغرس قيمة العمل وقيمة الإنسان من الصغر والطفل لازم يعرف إن العجلة اللي بسبعة آلاف دي وراها 10 سنين شغل"، وطالبت بفتح "نقاش مجتمعي موسع" لمواجهة الظاهرة مؤكدة استعدادها للمشاركة في حوارات متخصصة لأن "الموضوع كبير ومحتاج فقرات كاملة والوازع الديني والقانون لوحدهم مش كفاية دلوقتي"، واختتمت بقولها "إحنا فقدنا حاجز الرحمة ولازم نرجعه قبل ما نوصل لمرحلة ما يبقاش فيها مكان للرحمة خالص".