خبير طاقة كهربائية: 5 تعليمات لتتجنب حرائق المشتركات الكهربائية في الحر
حذر د. أحمد الشناوي، خبير الطاقة الكهربائية، من تزايد مخاطر الحرائق داخل المنازل مع ارتفاع درجات الحرارة، مشيرا إلى أن معظمها يحدث بسبب "أخطاء بسيطة جدا" في استخدام الأدوات الكهربائية.
اعرف هشغل المشترك على إيه.. كل مشترك ليه أمبير معين
وعن أول نصيحة، قال خبير الكهرباء: أول حاجة مثلا المشترك الكهربائي.. لما ننزل نشتري مشترك كهربائي لازم نعرف هشغله على إيه، هل أشغله على مثلا رسيفر وتلفزيون شاشة LCD وموبايل، ولا أشغله على سخان بالكهرباء أو غلاية الكاتل أو مايكروويف أو إير فراير، متابعا: لازم أعرف لأن كل مشترك ليه أمبير معين.. ما ينفعش مع الأجهزة ذات الطاقة الصغيرة والعكس صحيح".
وأضاف خبير الطاقة الكهربائية، خلال داخلة ببرنامج “الساعة 6” على قناة الحياة: “إحنا متخيلين مدى خطورة إن أي مشترك في البيت تشغل عليه أي حاجة في الدنيا ونوصل بيه كهرباء لأي حاجة.، مشيرا إلى أنه عندما نذهب لشراء مشترك: ”نروح للراجل نقول له إيه نوع الأجهزة اللي أشغلها.. عشان يديك الأمبير كويس وعشان يديك المشترك كويس، لأن لو أنا استخدمت مشترك يعني كده بشكل عشوائي أي مشترك ده يعمل لي مشاكل.
وأوضح أنه كلما كان الأمبير عال كلما كان السعر مرتفع، مضيفا: يعني هتشغل عليه زي ما قولنا تلفزيون رسيفر شاحن موبايل ده سعره أرخص من اللي هتشغل عليه الإير فراير هتشغل عليه الغسالة الأوتوماتيك. ده هي الأجهزة كثيفة الاستهلاك للطاقة".
خطورة وضع مشترك داخل المشترك
ولفت إلى أن من بين الكوارث وضع المشترك داخل مشترك آخر.. المشتركات الصغيرة وأيضا بتحطها كذا جهاز في المشترك الواحد فده غلط جدا، متابعا: في ناس بتحط في البريزة الستة مشتركات الصغيرين بتاع المشترك الكبير ده.. تحطه مشترك تاني وتحط عليه أجهزته.
ده غلط جدا وتحميل ده زيادة".
افصل المشترك لما تخرج من الشقة
وتابع: حاجة تانية برضو حاول لما تخرج ما يكونش حد موجود في الشقة حاول تفصل المشترك، موضحا: الناس كمان بتحط المشترك في أماكن سيئة جدا.. يعني مثلا تلاقي المشترك جنب شباك ألوميتال جنب شباك داخل أشعة الشمس طول اليوم.. نحاول نضع ستارة تفصل بينهم".
ماتسيبش الموبايل على السرير
وتابع: "إحنا بنعمل أخطاء ممكن تعمل كوارث.. تلاقي مثلاً واحد بيشحن الموبايل ويحطه على السرير ويسيبه.. الموبايل يتعرض لسخونة، والبطارية لو مش كويسة أو بقالها عمر وعدت العمر الافتراضي بتاعها ممكن تسبب مشكلة.
الشوحان الخاصة بالهاتف لازم تكون أصلية
وواصل: كمان الشواحن اللي مش أصلية أو اللي بنشتريها من أي مكان دي بتأذي البطارية وبتخليها تشحن زيادة عن اللزوم.. لازم لما نيجي نشتري شاحن نشتريه من أماكن معتمدة ويكون الأوريجنال بتاع الموبايل.. الشواحن اللي غير أصلية دي ممكن تعمل كوارث، بتشحن البطارية بطريقة غلط وممكن تنفجر وهو ماشي بيك في الشارع".
