ياسمين عز: لما بشوف حد بيشتغل شغلانه صعبة بتأثر عشان أنا كائن رقيق ورهيف
قالت الإعلامية ياسمين عز: «في عامل دليفري بسيط كان صايم وقاعد بيفطر في الجنينة بعدين رمى الحاجة اللي معاه في الباسكت وقام يصلي ومعملش أي حاجة ليه نتفاجئ بأحد سكان هذا الكومباوند إنه صوره ونزل صورته ومتضايق من المنظر وبيشتكي والدليفري ما كانش متوقع إن يحصل كده».
وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «بصراحه انا مش قادرة أفهم إيه الخطر الداهم اللي حصل في الدنيا عشان نصور بني آدم شقيان بياكل بعد ما كان صايم.. يعني حضرتك متضايق من إيه هو مش بياكل من أكلك ولا في بيتك هو بياكل لقمة حلال بعد تعب خالص يعمل إيه يعني يطير ولا يختفي عشان أنت متشوفوش».
وتابعت: «إحنا وصلنا لمرحلة إننا بنشتكي من بني آدم بياكل حتى لو جوه كومباوند بس هو مسببش أذية لحد بلاش نضيق الدنيا على الغلابة هو معملش حاجة عيب ولو اتضايقت ممكن تنصحه بكلمة طيبة إنما مش شكوى ونصوره وننزله بدون علمه».
كما وجهت ياسمين عز رسالة للشخص الذي صور العامل:«سهلها على نفسك عشان الدنيا تبقى سهلة ومش عايشين في سويسرا إحنا مجتمع عربي وأولاد بلد واللي شفته ده معملكش تلوث بصري.. أنت لو طلعت خارج حدود الكومباوند هتشوف كل حاجة أنت مش ساكن في المدينة الفاضلة يعني في استثناءات زي القانون وروح القانون .. وفي الاكل بالذات مش بناخد الموضوع كده».
واختتمت ياسمين عز: «بقى لي سنة لما دليفري بيجيلي بجيب كيس ثلاجة أحط فيه عصير ومياه صغيرة ومعاه بسكوت أو حاجه مسكرة والله ميكلفش أي حاجه أنا مش بقول كده إني بتفضل على الناس.. لأ أنا مواطنة صالحة وعايزة الناس تتعلم مني وأنا عرفت ده من ست وقلدتها وهو مش بيكون عارف ده بيت مين مش عارف إن ده أنا لكن هو بيفرح ولا كأني اديته مليون جنيه بس هو فرح علشان الإنسانية..أنا لما بشوف حد بيشتغل شغلانه صعبة بزعل وبتأثر عشان أنا كائن رقيق ورهيف».
