ياسمين عز: شكرا يا صلاح مردوده في حنة كيان.. ومرموش حسابه معانا بعدين
قالت الإعلامية ياسمين عز: «مصر زعلانة والمصريين زعلانين والعالم كله زعلان بسبب اللي حصل في مباراة مصر والأرجنتين، زعلانين بس فخورين متكسبش بفخر أحسن ما تكسب بأكل الحرام زي ميسي واتفونتينو إحنا غيرنا اسمه ولغيناه خلاص».
وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «خسرنا ظلم بسبب الحكم والفيفا والعنصرية انفنتينو وميسي اتحدوا ضدنا ولغولنا جول في مزاجهم وفي أقل من ربع ساعة خسرنا 3-2 بعد أجوال مشكوك في صحتها.. اللي زعلنا إننا كنا قربنا واتعشمنا لكن كان في أيادي خبيثة قررت تبوظ علينا الإنتصار والفرح لكن العالم كله وربنا قبلهم شاهد على سرقة الماتش وسجل يا تاريخ إن ميسي العيوطة عيط عشان إحنا كسبنا.. هو كتيبة المحترفين احتاجوا الحكم يبقى معاهم بالظلم عشان يكسب علينا متخيلين هما خايفين مننا إزاي.. ومن هنا ورايح المصريين هيشجعوا أي حد إلا ميسي أنا لو لعبت قدام ميسي هيشجعوني عادي وعايزين نشكر منتخبنا والرجاله اللي شرفونا ورفعوا رأس كل مصري شكرا يا محمد صلاح يا قائد يا عالمي يا مهنينا يا مفرحنا تسلم يا أبو مكه يا محترم ومردوده ليك في كتب كتاب مكة أو حنه كيان.. وكابتن مصطفى شوبير صغير السن كبير المقام شوبير باشا بيه شكرا يا حارس عملاق».
وتابعت: «عمر مرموش شكرا وكل حاجه لكن حسابك لما ترجع وزيكو شكرا وربنا يبارك لك يا ابني كفايه انك انت الوحيد قدرت تنغص عيشك البرازيل والأرجنتين مع بعض ونشكر الغزال الأسمر هيثم حسن وبدعوك إنك تيجي النادي الأهلي تمتعنا.. أنت خسارة في الدرجه الثالثة في إسبانيا أنت ميسي الحقيقي ومسحت بلاعبي الأرجنتين نجيلة الملعب تعالى الأهلي وهتتبسط».
وواصلت: «تريزيجه بجد ليه ضيعت الجول بس يلا المسامح كريم.. وشابوه لمحمد هاني أحسن باك يمين في كل العالم ولو جبت جولين في مصطفى شوبير إحنا مسامحين .. كابتن حسام حسن شكرا يا كوتش على كل حاجه بس ليا عندك عتاب صغير يعني لما لقيتها كدا كدا خربانة ما اديتش الحكم بالنص ليه الملعب كان سداح مداح بس طبعا معملتش كده علشان أخلاق اللاعيبة».
وأدرفت: «ورامي ربيعه وتحته 100 خط شكرا.. لو كان عندنا زمان وائل جمعه الصخرة دلوقتي عندنا الدبشة رامي ربيعة كويس إنك عرفتهم إن مصر فيها أطوال ومش عايزه أنسى أقول ان انت شرفتني بشكل كبير وطويل.. كابتن إمام عاشور شكرا على الأداء الرجولي طول البطولة لكنعندي طلب صغير لو قابلت كابتن مرموش شكرا وحسابك معانا بعدين».
