ياسمين عز: الغش عقوبته حبس.. شكلك إيه قدام المجرمين وأنت داخل في سؤال عربي

قالت الإعلامية ياسمين عز: «النيابة العامة أمرت بحبس المتهمين في تسريب الامتحانات والغش ومن ضمنهم كان في واحد بيقف أعلى الكوبري اللي لازق في أحد اللجان وبيقول اجابات الأسئله بصوت مسموع لابنه زي فيلم برشامه وقال إنه خد الأسئله من جروب على تليجرام.. الموضوع مهم ولازم يتواجه بقوة عشان اللي تعب يلاقي مجهودة».

وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «كل شويه أشوف صورة لطفل مدرس بيطلع من ودنه سماعة مش معقول كده والسماعة بـ 1000 دولار يعني حاجة و50 ألف جنيه مش للدرجة دي أنت ممكن تعمل مشروع بيهم أو ذاكر جزء صغير ينجحك».

وتابعت: «في ناس مبتعرفش تذاكر واتولدت إنها متعرفش تتذكر المعلومة ولا تحفظ.. حله إنه يراجع أي حاجة ويعدي زي الأرجنتين كده أو عدي بالواسطة.. وبعدين في الأخر يعني لو هتعدي له سماعة النهارده هيعدي فين بعد كده لو بقى مهندس هتحط له سماعه وهو بيبني بيت، طب لو طلع دكتور هيحط سماعة وهو بيعمل عملية.. ويبقى أبو سماعة راح أبو سماعة جه».

وواصلت: «مرة وأنا صغيرة يوم الخميس كنت بذاكر ومامتي تقول لي خلي بالك من مجهودك وأنا كنت الدحيحة اللي مش بتغشش حد كنت بقعد في اللجنة لا ارى لا اسمع لا اتكلم ..وعمري ما رديت على شيماء اللي كانت معايا في اللجنة.. أسفة إن أنا مغششتكيش لكن كنت خايفة من مامتي والمراقب وبعدين كان عندي 10 11 سنه هغششك ازاي.. عموما أنا بحب الدراسة والمذاكرة علشان هتفيد نفسك لكن يلا أنا زهقت من كتر ما ما نصحتكم مش هنصحكم تاني إن شاء الله تجيبوا ملاحق».

وأدرفت: «وبعدين شكلك إيه لما تتحبس في غش.. هيسالوك جاي في إيه تقولهم جاي في سؤال عربي شكلك إيه قدام المجرمين لما الناس تبقى داخلة في سرقه ولا قتل وأنت داخل في سؤال عربي».

وفي وقت سابق، قالت الإعلامية ياسمين عز: «مصر زعلانة والمصريين زعلانين والعالم كله زعلان بسبب اللي حصل في مباراة مصر والأرجنتين، زعلانين بس فخورين متكسبش بفخر أحسن ما تكسب بأكل الحرام زي ميسي واتفونتينو إحنا غيرنا اسمه ولغيناه خلاص».