تامر أمين يشيد بمنتخب مصر: لو حد كان قالنا إننا هنعمل ربع اللي حصل مكناش هنصدق

أشاد الإعلامي تامر أمين بأداء منتخب مصر خلال مباراة نيوزيلندا، قائلا، «خيال ده يا ناس.. لو حد كان قالنا إننا هنعمل ربع اللي عملناه ده ونكسب نيوزيلندا كنا هنقوله يلا ياعم من هنا بلاش أوهام».

وأضاف، خلال حلقة اليوم من برنامج «آخر النهار» المذاع عبر شاشة النهار: «أحلم وصدق حلمك وهتوصل وإن شاء الله نفوز على إيران ونصعد أول المجموعة».

وفي سياق متصل، تحدث الإعلامي تامر أمين عن آخر تطورات الحالة الصحية للكابتن أحمد حسام ميدو، قائلا: «الحمدلله منذ دقايق قليلة خرج أحمد حسام ميدو من بناءا رغبته هو من المستشفى ورجع البيت لكن مع ملاحظة طبية دقيقة لمدة 48 ساعة». 

حادث ابنه ودخوله الحبس

وأضاف خلال تقديم برنامج «آخر النهار»، المذاع على قناة «النهار»: «عارفين طبعا إن ميدو اتعرض لظرف أسري صعب خلال اليومين اللي فاتوا، كان في حادث وقع لابنه ودخل ابنه في محاكمة بسبب هذا الحادث وأخذ حكم، امبارح تم تأييد الحكم ورفض الاستئناف، بالتالي ابنه هيتحبس 7 أو 8 أشهر نتيجة الواقعة التي حدثت». 

حالة نفسية صعبة

وتابع: «ميدو من ساعتها وهو في حالة نفسية صعبة، أي أب في الدنيا لما يلاقي ابنه في هذه الورطة وميعرفش يعمله حاجة بيبقى شء صعب ربنا ما يكتبه على حد أبدا، بالتالي ميدو قعد يكتم وجسمه تأثر لحد ما حصله هذه الجلطة الخفيفة على للمخ ودخل المستشفى لكن الحمدلله خرج بالسلامة وفي البيت ويتم مراعاته طبيا». 

توجيه رسالة إلى ميدو 

واختتم تامر أمين حديثه بتوجيه رسالة إلى ميدو قائلا: «تشجع وانت راجل وتجلد، انت قوي وصلب وأنا عارفك كويس جدا، كلنا ممكن نتعرض لحاجة صعبة، خاصة في الضنا الموضوع صعب، لكن أرجع وأقول الضربة اللي ما بتموتش بتشد سواء ليك أو ليه يا ميدو وهو درس وهيتعلم منه وفترة قصيرة وهيرجعلك ويكون اتعلم من الدرس وإن شاء الله يبقى أشد وهتشوفه أحسن الناس، ميدو عصبي وانفعالي وبيخبط يمين وشمال لكن ميدو على الحقيقة من أجدع الناس أنا أعرفه من 15 سنة».