سيدة من الإسكندرية تروي تفاصيل صادمة داخل مستشفى الشاطبي: معاناة كبيرة

تواصلت ردود الفعل الصادمة حول أزمة مستشفي الشاطبي، وروت السيدة “د.أ” من الإسكندرية، تفاصيل تجربتها مع مستشفى الشاطبي أثناء حملها في طفل كانت تعاني حالته من مشكلات قلبية معقدة، مؤكدة أنها تعرضت لسلسلة من المواقف الطبية المتباينة وسوء المعاملة خلال فترة تواجدها بالمستشفى.

ردود الفعل الصادمة حول أزمة مستشفي الشاطبي

وقالت إنها اكتشفت في الشهر السابع من الحمل وجود أربع مشكلات خطيرة في قلب الجنين، من بينها انعكاس وضع القلب، وضمور في الجانب الأيمن، وضمور في الشريان الأورطي والشريان التاجي، مشيرة إلى أن الأطباء أبلغوها بأن الطفل يحتاج إلى تدخل جراحي عاجل بعد الولادة، وأن فرصته في البقاء لا تتجاوز 3 أسابيع.

وإليكم تفاصيل تجربة “د أ” مع مستشفى الشاطبي:
السلام عليكم ورحمة الله وبركاته، أنا من الإسكندرية، كنت حامل في طفل، عملت أشعة في الشهر السابع، وفي أول يوم عرفت أن الطفل ده عنده أربع مشاكل في القلب.

قلبه متكوّن بالعكس: اليمين مكان الشمال والشمال مكان اليمين، وعنده ضمور تام في الجانب الأيمن من القلب، وضمور تام في الشريان الأورطي، وضمور في الشريان التاجي، وعرفت إنه لازم يعمل عملية في أسرع وقت بعد الولادة، لأنه لن يكون أمامه سوى 3 أسابيع فقط بعد الولادة، لأن في شيء كده بيقفل في القلب، مجرد ما يقفل الطفل ده هيتوفى، والجزء ده ممكن يتفهم أكتر لو حد طبيب قلب.

المهم إن العملية دي كانت بتتكلف مبالغ باهظة تصل لملايين، فالدكتور قال لي الحل الوحيد إنّي أولد في الشاطبي عشان يطلع على حضانة الشاطبي ويتعمله العملية على نفقة الدولة. رحت فعلًا المستشفى على أمل أشوف الدنيا وأولد هناك وأمري لله، ومكنتش أعرف بصراحة إن الأمور واصلة لكده.

بقول للدكتور: الجنين ده مش بيتحرك خالص عشان يفهمني السبب وهل له علاقة بموضوع القلب ولا لا، مردش عليا. سألته تاني، قلت له: يا دكتور الجنين مش بيتحرك خالص، رد عليا بطريقة وحشة وقال: وانا أعملك إيه؟

سكتت، وطلعت الممرضة قاست لي الضغط، كان الضغط عالي، وشكت في تسمم حمل، وخلوني أعمل تحليل عندهم، وبالفعل عملت التحليل وطلع فيه اشتباه تسمم حمل. رجعت الغرفة عشان أديهم التحليل، مدخلونيش الأوضة تاني، وأخذوا مني التحليل، وبعدها طلعت الممرضة ادتني ورقة عادية للأسف مفيهاش أي إثبات إنها من المستشفى، فيها نوعين دواء.

الله أعلم بقى مين اللي كتب الدواء ده، ممرضة ولا دكتور، طبعا أنا شكيت، فرحت أعدت التحليل في معمل البرديني، وطلع مفيش تسمم حمل، رجعت للدكتور بتاعي قال إن التحليل ده عكس ده خالص، بس أنا أثق في تحليل معمل البرديني، فهنعيد في مكان تالت، وأعدت التحليل للمرة الثالثة في مبرة العصافرة، وطلع مفيش تسمم حمل.

وأنا بطلع للدكتور بنتيجة التحليل، شاف الورقة اللي فيها اسم الدواء واتخض وقال لي: إنتِ خدتي دول؟ قلت له لا، قال: دول يوقفوا قلبك، متاخديش منهم حاجة، لأن الجرعات اللي كانوا عايزينني آخدها كبيرة جدا. والدكتور قال لازم الضغط ينزل لكن مينفعش ينزل مرة واحدة كده.

يعني حضرتك معاملة سيئة نتيجة تحليل خطأ، كتبوا لي دواء غلط ومفيش أي دليل معايا، وأخذوا التحليل مني وأعطوني ورقة فيها اسم نوعين دواء. رحت أشتكي، والدكتور كان في اتنين قاعدين قالوا لي محدش هيعمله حاجة طالما مفيش اعتداء لدرجة السب أو الضرب، والمديرة لو اتحركت يا دوب هتقوله كلمتين بس.

جبت وأنا ماشية أدخل التواليت، وحالتي النفسية كانت سيئة جدًا لأن ابني هيتوفى، والسيدة عاملة النظافة مش راضية تدخلني، قالت لي روحي الحمام التاني عشان أنا نضفت. وكان عندي مشكلة كمان في فتح عنق الرحم وبمشي بصعوبة شديدة، ومن الصبح قبل الساعة 8 في المستشفى لحد الساعة 2، وحامل وظروف حمل سيئة وظروف طفل بيموت، ومحدش مراعي ربنا فيهم، لكن بصراحة كان في موظفة وممرضة في قمة الاحترام والرحمة والأخلاق.

الكشف كانوا بيدخلوا خمس حالات مع بعض. كان في بنت قبلي شكلها صغيرة من الأرياف وواضح إنها متجوزة صغيرة جدا، وكانت الممرضة هناك بتتعامل معاها بطريقة سيئة جدًا وبشعة، وموبايل البنت رن، قالت لها لو رن تاني هطلعك بره، والبنت كانت صغيرة في السن ومش عارفة تدافع عن نفسها.

معنديش مشكلة إنك تنزل الموضوع على النت، بس بلاش صورتي واسمي، لكن ده فعلا حصل، وابني توفاه الله وملحقش يعمل العملية لأنه ما تحملش أشعة الصبغة، وأنا مرضتش أولد في المستشفى، ولدت في مستشفى خاص، ومشكلتنا مكانتش مصاريف الولادة، لكن إن عملية الطفل كانت محتاجة مبالغ باهظة.