سماح أنور: ترامب شخصية كوميدية والعالم يعيش حالة جنون

وجه الإعلامي عادل حمودة سؤالا للفنانة سماح أنور، قائلا:« بتتابعي الأحداث العالمية وبتشوفي الرئيس الأمريكي بيكدب كام مرة في اليوم».

لتجيبه سماح أنور، معلقة على الأحداث والأزمات في الشرق الأوسط بسبب الحرب الأمريكية الإيرانية،خلال استضافتها في برنامج «حقك تعرف»، قائلة:« دونالد ترامب ده من أيام البزنس بتاعه وهو بالنسبالي كومديان وذكي وبحب اتفرج عليه لكن عمري ما باخده جد واعتقد العالم كله مش هياخده جد هو مجرد فقرة كوميدي كده بس شريرة شوية».

وأضافت: «هور ربنا يستر.. حقيقي أنا شايفة غن العالم حاليا في حالة جنون فظيع وعنيف جدا.. حتى في الشارع ده لو حد كسر على حد بالعربية بيجيب حديدة ويضربه بيبقى عايز يموت وخلاص، يعني ردود الفعل بقت أوفر وعنيف».

وأردفت:« أنا عندي الحل إن كوكب الأرض ميبقاش في حروب.. الفكرة إن عالم الرجال قاسي جدا وكله منافسة ويا أنا يا أنت، لكن عالم النساء أنا وأنت.. الحل إننا نعمل دعوة على الكوكب إن كل الرجال إللى في موقع سلطة يسلموا زمام الأمور للنساء لأن الستات مش بتوع خناق عنيف.. الستات بتوع قعدة وصلح، الغيرة حتى عند الستات شخصية مش عامة يعني مش هقتل ولادها، لا خالص ده ممكن أعمل عملية تجميل وأكون أجمل منها.. نجرب ما إحنا جربنا الرجالة ومنفعش».

فيلم «بيت القاصرات»

وفي سياق حديثها، تطرقت الفنانة سماح أنور، خلال حديثها، إلى الأفلام التي قدمتها طوال مسيرتها الفنية، مؤكدة أنها تعتبر دورها في فيلم «بيت القاصرات» من أهم الأعمال التي قدمتها وأقربها إلى قلبها.

وقالت:« بالرغم من إني نجحت وكسرت الدنيا في بيت القاصرات ده، لكن بعده قعدت، وأنا اكتشفت مع الوقت إنك لما بتنجح أوي بيقعدوك علشان متطلبش كتير وتتغر.. وقعدت 3 سنين مفيش حاجة».

وعن فترة ابتعادها عن التمثيل، أوضحت سماح أنور:« أنا لما قعدت كنت مع أدهم، لأني مش مع فكرة إن حد يربي ابن حد.. أنا أبويا وأمي في فترة الحادثة بتاعتي كانوا متوليين مسؤولية أدهم، لكن بعد وفاتهم في 2008 مكانش في غيري يشيل المسؤولية».

وأضافت: «أنا حبيت ده جدًا ومكنتش شايفة إني بضحي، لا خالص، هو كده كده مكانش حد بيبعتلي، بس أنا نسيت خالص إني بمثل، كأنها مش حياتي، وبقيت ماما وقعدت 20 سنة في البيت».