انتحلت شخصية واحدة فرنساوية مصرية واشتغلت شيف..سماح أنور تكشف مفاجأة عن حياتها

قالت الفنانة سماح أنور: «أنا شخصية أنانية جدا وطول الوقت بحافظ على نفسي ويهمني مشاعري وإني مبقاش متعكننة او زعلانة.. حتى كل ما بيقابلني مشكلة بدور على حلها مش ببص على مشكلة».

وأضافت، خلال استضافتها في بودكاست «حقك تعرف» مع عادل حمودة: «أنا مبحبش الدراما ومبحبش أقول على مشكلة إنها كبيرة .. وأنا اتعلمت إن كل حاجة تاخد وقتها ومضغطش نفسي لكن لما أكون عندي حاجة عازة أعملها بخلصها بسرعة وبعدين أرجع رايقة تاني».

سماح أنور: «بيت القاصرات» أهم أعمالي.. وابتعدت 20 سنة لتربية ابني

تطرقت الفنانة سماح أنور، خلال حديثها، إلى الأفلام التي قدمتها طوال مسيرتها الفنية، مؤكدة أنها تعتبر دورها في فيلم «بيت القاصرات» من أهم الأعمال التي قدمتها وأقربها إلى قلبها.

وقالت: «بالرغم من إني نجحت وكسرت الدنيا في بيت القاصرات ده، لكن بعده قعدت، وأنا اكتشفت مع الوقت إنك لما بتنجح أوي بيقعدوك علشان متطلبش كتير وتتغر.. وقعدت 3 سنين مفيش حاجة».

«اخترت أكون ماما قبل أي حاجة»

وعن فترة ابتعادها عن التمثيل، أوضحت سماح أنور: «أنا لما قعدت كنت مع أدهم، لأني مش مع فكرة إن حد يربي ابن حد.. أنا أبويا وأمي في فترة الحادثة بتاعتي كانوا متوليين مسؤولية أدهم، لكن بعد وفاتهم في 2008 مكانش في غيري يشيل المسؤولية».

وأضافت: «أنا حبيت ده جدًا ومكنتش شايفة إني بضحي، لا خالص، هو كده كده مكانش حد بيبعتلي، بس أنا نسيت خالص إني بمثل، كأنها مش حياتي، وبقيت ماما وقعدت 20 سنة في البيت».

من التمثيل إلى الطبخ والـ«لايف كوتش»

وأشارت إلى أنها خلال تلك الفترة تعلمت الكثير، قائلة: «اشتغلت أونلاين في تصميم المواقع قبل ما يكون في ذكاء اصطناعي بيعملها، ودرست لايف كوتش واشتغلته فترة، وكمان درست الطبخ وأخدت شهادة إني شيف من فرنسا».

وتابعت: «فتحت من بيتنا مجال شغل طبخ، وعملت نفسي واحدة فرنساوية مصرية علشان محدش يقول سماح أنور بقت بتشتغل شيف».

«كنت واثقة إني هبقى أعظم ممثلة»

وفي سياق آخر، قالت الفنانة سماح أنور: «أنا من وأنا في المدرسة كنت عارفة إني ممثلة، مش عايزة أكون ممثلة.. ولما كنت صغيرة وبعدي من قدام سينما في وسط البلد مثلًا، كنت بقول الناس دي مش واخدة بالها إن اللي بتعدي جنبهم دي أعظم ممثلة، وهيتجننوا لما يشوفوني.. بس هي مسألة وقت».