كلاكيت تاني مره.. زلة لسان لـ محمد دياب ضد محمد رمضان

أثار المخرج محمد دياب، حالة من الجدل عبر منصات التواصل الاجتماعي المختلفة، عقب ظهوره بالأمس رفقة صُناع فيلم أسد، ببرنامج الحكاية، الذي يقدمه الإعلامي عمرو أديب.

وجاءت حالة الجدل بعد تصريحات محمد دياب عن الفنان محمد رمضان، والذي اعتبرها البعض مسيئة للأخير، نظرًا لاختلاف شخصيته في فيلم أسد عن نوعيه أعماله السابقة.

وقال محمد دياب، في تصرحه الأخير عن محمد رمضان: "أنا اللي كان عندي تحدي كبير جدًا وكنت مرعوب منه، عشان الناس كانت بتقولي ورينا بقى هتعمل إيه بعد Moon Knigh، ورايح أشتغل مع مين بقا بالنسبالهم مع محمد رمضان، والناس ممكن تشوف إن التوليفة بينا مختلفة".

وأضاف محمد دياب، قائلًا: "أنا رأي إن محمد رمضان جوهرة ولسه عنده أكتر يقدمه، وفيلم أسد هيظهره بشكل جديد ومختلف عن اللى الجمهور متعود عليه، رغم نجاحه الكبير طبعًا، والناس هتبقى فخورة بيه".

أزمة محمد دياب وهشام ماجد

واستعاد رواد السوشيال ميديا، تصريح محمد دياب عن الفنان هشام ماجد، الذي تسبب في أزمة كبيرة، عقب نجاح مسلسل أشغال شاقة جدًا، قائلًا: "هشام كان ولا حاجة قبل اشغال شقة خالد دياب اخويا اللى رفعه دا كان تحت".

وعقب تداول ذلك التصريح بشكل واسع من رواد السوشيال ميديا، اضطر محمد دياب، لتقديم اعتذار لـ هشام ماجد، من خلال مقطع فيديو عبر حسابه الرسمي على موقع تبادل الصور والفيديوهات الشهير "إنستجرام".

وقال محمد دياب، خلال مقطع الفيديو: "اللى الناس متعرفوش إن أنا وماجد أخوات وعلاقتنا قوية جدًا ببعض لدرجة إن إحنا بنهزر هزار رخم عادى بنا وبين بعض". وتابع محمد دياب، قائلًا: "أنا فى محاولة بائسة إنى أبقى كوميديان هرجت التهريج دا قدام الكاميرات والناس طبعًا زعلت ولما فكرت فيها معرفش إزاى أنا هرجت التهريج دا قدام الكاميرا وأنا عارف الناس قد أيه بتحب هشام".

وأضاف محمد دياب، قائلًا: "هشام ماجد مش بس فنان وكوميديان كبير لكن ميعرفوش إنه فنان عظيم، وميعرفوش إن طريقة هزارنا السخيفة دى والهزار اللى بينا دا ساعات مش بيبقى ليه علاقة بالواقع لأن هشام نجم بقاله ١٥ سنة".

واختتم محمد دياب، قائلًا: "الدرس المستفاد إن أنا خليني فى الجد والتهريج دا خليه لناس تانية كتير والحاجة التانية إن هشام يابخته بجمهوره اللى يستحقه لأنه بصراحة من الفنانين والبشر المفضلين ليا".