محمد دياب مخرج أسد: الفيلم لا يدعم أفكار الافروسنتريك

كشف المخرج محمد دياب، مخرج فيلم أسد، حقيقة دعم فيلم أسد لأفكار الافروسنتريك.
 

وكتب محمد دياب عبر حسابه بموقع فيسبوك:"افروسنتريك معناها ادعاء أن المصريين اللي في مصر حاليا غزاة والحضارة المصرية أصلها إفريقي بناها الأفارقة، وده كلام فارغ طبعًا.أي شخص اتفرج على فيلم أسد شاف أن أول مشهد في الفيلم العبيد اللي في الفيلم بيتخطفوا من إفريقيا على يد قراصنة إنجليز وبعدها بيتباعوا في مصر. يعني العبيد اللي في الفيلم مش من أصل مصري وده بينسف الاتهام الباطل ده في أول مشهد في الفيلم! ده بالعكس ضده".

وأضاف محمد دياب:"شخصيًا عندي فيلم فرعوني شغال عليه وأعلنت عنه قبل كده بيكشف وهم فكرة الافروسنتريك تمامًا، ودي قضية مهمه فعلًا، بس بستأذن كل الوطنيين اللي خايفين علي مصر من أي مؤامرات ممكن نتأكد قبل ما تتهموا ناس في صفكوا؟ صناع فيلم أسد مصريين ناس وطنيين عملوا الفيلم بتفاني واشتغلوا عليه 3 سنين وصوروه بالكامل في مصر بإيادي مصرية وقدموا منتج بشهاده الجميع يساوي الأعمال العالمية في الجودة".

وتابع محمد دياب:"محتاجين دعمكوا عشان السينما المصرية صناعة وطنية ناجحة، تأثيرها مش مادي فقط بل هي قوة ناعمة مهمة لنشر الثقافة والوعي المصري.الكلام اللي كانت بتتناقله الصحافة عن أن الفيلم عن ثوره الزنج في العصر العباسي عاري من الصحة وعمره ما خرج من حد من صناع الفيلم. أسد بيتكلم عن منتصف القرن التاسع عشر لما مصر كانت أول دولة في المنطقة تلغي العبودية وازاي القرار ده في وقتها عمل زلزال اجتماعي".

واختتم مخرج فيلم أسد منشوره وكتب:"بدعوكوا كلكوا تتفرجوا علي الفيلم و طبعا النقد مرحب بيه، بس بستأذنكوا يكون نقد لحاجات موجوده في الفيلم".