«قالها وقفي جبنه».. زوج ضحية من ضحايا نظام الطيبات: زوجتي ماتت بسبب نظام ضياء

قال الدكتور محمود البريدي زوج ضحية نظام الطيبات، «إن زوجتي كانت ماشيه على الأدوية بتاعتها منذ عام 2018 لأنها كانت مريضة الذئبة الحمراء وكانت الأمور مستقرة وبعد ذلك هي شافت كذا فيديو منتشر لضياء العوضي وراحت دورت ولقت فيديو على اليوتيوب مع إعلامي مشهور بيقدمه على أساس انه بيقدم ثورة في الطب».

وأضاف خلال مداخلة عبر برنامج كلام الناس مع ياسمين عز المذاع على قناة إم بي سي مصر، «لقيتها بعد كده بتكلمني وبتقولي في حد طالع جديد وبعتتلي كام فيديو له فقولتلها لا الكلام ده مش صحيح وأنا مش مقتنع ولكنها مسمعتش كلامي وراحت جربت وده لشدة إقتناعها بكلام الراحل ضياء العوضي وأسلوبه». 

كانت عايزة تعملهالي مفاجأة 

وتابعت: «هي قالت تجرب وكانت عايزة تعملهالي مفاجأة إنها تخف من غير أدوية ولا حاجه ومن كتر إتصالاتي معاها لقيتها متعصبه شوية وبتقولي أنا تعبانه بس وفضلت أقولها مالك مقالتليش وبعدين زوجتي فضلت تتواصل بالرسائل على الواتساب مع الدكتور ضياء العوضي وتقوله يا دكتور قولي أنا تعبانه والتحاليل بتاعتي وحشه والمعمل بيحذرني وبيقولي النسب وحشة قولي أعمل اي أخد اي رد عليها مرة بعد 3 أيام قالها وقفي أكل الجبنه». 

واستكمل: «أن زوجته بالفعل وقفت أكل الجبنه وبرضو لم يحدث جديد النزيف شغال وتتصل بيه وتبعتله للدكتور ضياء العوضي تاني مبيردوش وأما ملقتش حد بيرد يأست تماما وراحت المستشفى وقعدت شوية وبعد كده توفت». 

وأكد أنه حصلت له صدمه بعد الوفاة وبعد كده بدأت أتواصل مع نقابة أطباء مصر وأنا مش بتكلم بعد ما هو مات لا أنا بتكلم من قبل ماهو يموت بشهور وقدمت شكوى للدكتور أسامه عبد الحي نقيب الأطباء وطلب مني الأدلة، وبعد ذلك النقابه طلبت ضياء للتحقيق ويمكن أن يكون ذلك كانت نتيجة على أنه اتشطب من النقابة واتقفلت عيادته وكنت بجهز مذكرة عشان أقدم شكوى للنيابة والمحامي بتاع الدكتور ضياء وأنا كنت في مداخله وهو كان موجود معايا في نفس المداخلة على إحدى القنوات الفضائية وقال إنه سأل الدكتور ضياء على المريضة دي وقال أنه هو لا شافها ولا يعرفها.