إنجي أباظة تدافع عن تامر حسني بعد انتقادات مناشدته لوزارة الصحة والسكان
حرصت الفنانة إنجي أباظة على أن تدافع بشدة عن المطرب تامر حسني خاصة بعد مناشدته لوزارة الصحة والسكان بسبب الأنظمة الطبية، وضرورة وجود فيديوهات استرشادية، وذلك من خلال منشور عبر حسابها الرسمي على موقع التواصل الإجتماعي فيسبوك.
دفاع إنجي أباظة عن تامر حسني
حيث قالت إنجي أباظة: “الأستاذ الدكتور الذي تبرع بالرد على تامر حسني، تفتكر تامر حسني معندوش الوعي والثقافة علشان يبقى فاهم وعارف إن الدكتور مجدي يعقوب مش اختصاصه زراعة الخضار أو صناعة الدواجن!؟، واحد زي تامر حسني، سافر وراح وجيه، وعنده دكاترة تغذية كتير صحابه، مش هيقدر يوصل لمعلومة زي دي في ثواني؟ .
وأضافت : واضح جدًا، ومش محتاجة تفكير، إن تامر اختار دكتور يثق فيه ملايين زي الدكتور مجدي يعقوب كمثال، يوصل بيه فكرة إن إحنا كمصريين محتاجين حد يطلع يتكلم بشكل علمي نثق فيه، زي الدكتور مجدي يعقوب الذي أفنى حياته في العلم وما شاء الله مصر ولادة عظماء، لأن فعلاً فيه بلبلة وسوء فهم حاصل .
وتابعت : تامر بيحاول يتكلم بلسان ملايين بيحاولوا يفهموا الصح فين، وبيستخدم شهرته علشان يوصل حيرة عند ناس كتير مش هيعرفوا يوصلوا صوتهم بسهولة وأكيد مش قضية لبن بالفراولة ولا بالموز!!!، وصلتوا إن أي حد فنان أو عنده قدر من الشهرة بيخاف يتكلم، زيه زي أي مواطن، يخاف حتى يكون داعم أو وسيط للناس البسيطة .
واختتمت : بلاش أسلوب التهكم على حد بيحاول يساعد، حضرتك عايز تاكل بيض مدحرج كله براحتك، وسيب غيرك يحاول يساعدك ويقدر يتكلم من غير خوف”.
تامر حسني يتحدث عن الفتنة الغذائية
وقد ناشد الفنان تامر حسني وزارة الصحة والسكان لعمل فيديوهات توعوية وتقديم نصائح للجمهور بما يؤكل أو نمتنع عنه، بالتزامن مع انتشار ما يُسمى بالفتنة الغذائية بعد نظام الطيبات الذي أطلقه ضياء العوضي، وذلك من خلال منشور عبر حسابه الرسمي على موقع التواصل الإجتماعي فيسبوك.
حيث قال تامر حسني: “في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر هل ممكن أناشد وزارة الصحة المصرية وكبار الدكاترة المختصة وأصحاب المستشفيات بردود كافية فيها شرح مفصل عن إيه الأكل المفيد لينا وإيه اللي مش مفيد وياريت يكون شرح مفصل يفهمه الشخص العادي من غير أي مصطلحات طبية أجنبية؟؟؟”.
