ياسمين عز: «أهلك جوزوكي عشان يرتاحوا منك.. محدش طايقك انتي وعيالك»
في حلقة جديدة من برنامج «كلام الناس» المذاع على شاشة «mbc مصر»، وجهت الإعلامية ياسمين عز انتقادات للزوجات اللاتي يطلن البقاء في منزل أهاليهن، معتبرة أن هذا التصرف يؤثر على راحة الوالدين ويسبب إزعاجا للأشقاء بسبب تصرفات الأطفال.
كلي واتكلي على الله
وبدأت عز حديثها بمطالبة الزوجة بأن تكون خفيفة في زياراتها، قائلة: «إنتي بتبقي قاعدة عند أهلك ليه؟ ما تتغدي وروحي.. اتعزمي، كلي وتنبسطي وتمشي، بلاش فكرة إنك تاخدي عيالك السلاحف وتباتي بالأسبوع، كفاية كده».
دفاع عن الخال والخالة
وانتقدت ياسمين عز تدخل الزوجات في شؤون أشقائهن الصغار ومحاولة فرض أطفالهن عليهم، معلقة: «طول ما انتي قاعدة بتأمري وتتأمري.. اغسلي لابني، سخني لبن لابني.. وخالتو أصلا زهقانة من الدنيا وعايزة تطفش، تروحي انتي قارفة خالتو بطلباتك؟».
وتابعت: «تزعلي وتتقمصي لو أخوكي اشتكى إن ابنك المقروض كسر البلاي ستيشن، أو أختك زعقت لبنتك عشان بتلعب في مكياجها اللي جايباه بجمعية؟ واجهي نفسك.. محدش طايقك ولا طايق عيالك».
جوزوكي عشان يرتاحوا منك
وأكملت ياسمين عز: «أهلك جوزوكي يا حبيبتي عشان يرتاحوا منك أصلا، مش عشان تجيبي لهم نسخ كتير أصغر حجما منك.. ولادك بيقلبوا البيت مرستان وبيوسخوا الأرضية، والست كبرت ومش قادرة.. سيبي أهلك يعيشوا في سلام، النسخ دي لازم تنقرض».
المفاجأة: مامتك هي اللي قالت لي
وفي ردها على التساؤلات المتوقعة حول سبب تدخلها، قالت ياسمين عز: «هتقولولي ويا ترى انتي مالك يا ياسمين؟.. هقولك مامتك هي اللي اشتكت لي منك، قالت لي اتكلمي يا ياسمين، مامتك هي اللي شكت لي من عمايلك وعمايل عيالك.. نقطة».
وواصلت: «ربي عيالك يا شيماء، وقومي خدي ولادك دلوقتي وروحي بيت جوزك، متبصيش لمامتك لأنها هي اللي بعتالي».
وعلقت الإعلامية ياسمين عز على الزوجات اللاتي يأخذن احتياجات منازلهن من خزين ومطبخ بيت الأهل، معتبرة أن هذا السلوك يؤثر سلبا على ميزانية الآباء، خاصة في ظل الضغوط المالية المتعلقة بتكاليف الزواج.
جرد المطبخ وسلاحف النينجا
وقالت ياسمين عز في برنامجها «كلام الناس» المذاع على شاشة «mbc مصر»: «ليه وأنتي مروحة من بيت أهلك مع عيالك سلاحف النينجا لازم تلمي المطبخ كله؟.. بتاخدي الخضار واللحمة والفراخ وحتى البيض البلدي وزجاجة الزيت، وكأنك بتعملي جرد لبيت أهلك».
