«جوزي عايش ليومه وبس».. صرخة زوجة أمام محكمة الأسرة تنتهي بحكم الخلع
داخل أروقة محكمة الأسرة، وقفت سيدة في العقد الثالث من عمرها، تحمل بين كلماتها سنوات من المعاناة التي عاشتها مع زوجها، بعدما تحولت حياتهما الزوجية إلى حالة من الصمت والفتور، وغابت عنها المشاركة وتحمل المسؤولية، لتجد نفسها وحيدة في مواجهة أعباء المنزل ومتطلبات الحياة اليومية.
بدأت السيدة حديثها أمام المحكمة قائلة: «أنا اتجوزت زي أي بنت، وكان عندي أمل أعيش حياة مستقرة، وأبني بيت فيه تفاهم ومودة، لكن مع مرور الوقت اكتشفت إن جوزي مش بيفكر في التقدم أبداً، ولا عنده رغبة إنه يطور من حياته أو يحسن ظروفنا، وكل اللي يهمه إنه يعيش يومه وخلاص».
وأكملت: «المشكلة مش بس إنه مش بيسعى للأفضل، لكن كمان مش بيهتم بأمور البيت، ولا بيسأل عن احتياجاتنا، ولا بيحاول يعرف إحنا ناقصنا إيه كنت بحاول أتكلم معاه وأفهمه إن الحياة الزوجية مسؤولية مشتركة، وإن البيت محتاج تعاون من الطرفين، لكنه كان دايماً بيتجاهل كلامي».
وأضافت: «وصل الحال إنه بقى منعزل عني بشكل كبير، يقعد لوحده بالساعات، ومفيش بينا كلام أو مشاركة في تفاصيل حياتنا حتى لما كنت بحاول أفتح معاه موضوع أو أتكلم عن مشكلة بتواجهني، كنت بحس إني بكلم نفسي، مفيش اهتمام ولا استجابة، وكأن وجودي في حياته مجرد شيء عادى
وأشارت إلى أن الأعباء المالية كانت من أكثر الأمور التي زادت من معاناتها، قائلة: «حتى مصاريف البيت الأساسية، زي فاتورة المياه والكهرباء، مبقاش ملتزم بدفعها، وكنت بلاقي نفسي مطالبة أتصرف وأدبر الفلوس علشان البيت ميتعطلش، وكل شهر نفس المشكلة ونفس الخلافات، ومفيش أي إحساس منه بحجم المسؤولية اللي عليه».
وتابعت الزوجة أنها حاولت كثيراً احتواء الخلافات والحفاظ على استمرار الزواج، ومنحته أكثر من فرصة لتغيير أسلوب حياته والاهتمام بالبيت، لكنها لم تجد استجابة حقيقية، مؤكدة أن محاولاتها المتكررة لإصلاح العلاقة انتهت بالفشل، وأن الحياة بينهما أصبحت تفتقر إلى أبسط مقومات الاستقرار الأسري.
وأضافت: «أنا مكنتش بطلب منه المستحيل، كل اللي كنت عايزاه أحس إن عندي زوج أقدر أعتمد عليه، يشاركني المسؤولية ويحس بيا وبالبيت، لكن مع الوقت تعبت نفسياً من الإحساس إني لوحدي، وإن كل حاجة فوق كتافي، ومبقاش عندي طاقة أكمل في نفس الظروف».
وأوضحت أنها وصلت إلى مرحلة لم تعد تستطيع فيها الاستمرار في هذه العلاقة، بعدما فقدت الأمل في حدوث تغيير، وقررت اللجوء إلى محكمة الأسرة لطلب الخلع، حتى تتمكن من إنهاء زواج لم تعد تشعر فيه بالراحة أو الاستقرار.
واختتمت الزوجة حديثها قائلة: «أنا مشيت في طريق الخلع بعد ما حاولت كتير أحافظ على بيتي، لكن الحياة الزوجية مش مجرد إن اتنين عايشين تحت سقف واحد، لازم يكون فيه اهتمام ومسؤولية ومشاركة، وأنا تعبت من إني أكون لوحدي في كل حاجة».
وبعد نظر الدعوى والاطلاع على أوراقها، قضت محكمة الأسرة بخلع الزوجة من زوجها، لتنتهي بذلك علاقة زوجية ظلت تحاول خلالها الوصول إلى حياة أسرية مستقرة، قبل أن تختار إنهاءها بحكم قضائي.
