أحمد فلوكس يكشف حقيقة خلافه مع محمد رمضان: مش همثل معاه إلا لما آخد حقي
تحدث الفنان أحمد فلوكس عن حقيقة وجود خلافات أو عداوة بينه وبين الفنان محمد رمضان، موضحًا أنه لا يحمل أي عداوة تجاهه، وأن ما حدث لم يكن بسببه، مؤكدًا أنه لا يوجد ما يدعو لوجود خلاف بينهما.
وقال أحمد فلوكس، خلال حواره مع الإعلامي عمرو الليثي في برنامج «واحد من الناس» المذاع عبر شاشة الحياة: «معنديش عداوة معاه هما اللي عملوا كده ومفيش شئ يخلي في عداوه».
وأضاف أنه عندما سأله البعض عن سبب ما حدث، وهل كان يشعر بالغيرة من محمد رمضان، رد قائلًا: «لما قاموا سألوني وإحنا بنعمل احنا الطلبه قالوا لي انت كنت انجم منه فاتنجمت عليه طب ما هو انا لو انجم منه هعمل عليه نجم ليه وده مش طبعي أصلا».
وأشار فلوكس إلى أنه يتذكر موقفًا جمع محمد رمضان بوالده في عزاء الفنان محمود ياسين، عندما قبل رمضان رأس والده، مؤكدًا أن هذا الموقف ترك أثر طيب لديه، قائلًا: «لما تقابل محمد رمضان مع أبويا في عزاء محمود ياسين بأس راسه دي حاجه انا شلتها له لانها مهمه».
وعن إمكانية التعاون الفني بينهما مجددًا، أوضح أحمد فلوكس أنه لا يعتقد أنه سيشارك محمد رمضان في فيلم أو مسلسل، مشددًا على أن الأمر لا يتعلق بوجود خلاف شخصي، ولكن برغبته في الحفاظ على قيمته ومكانته الفنية، قائلًا: «لكن معتقدش همثل معاه في فيلم او مسلسل مش عشان حاجه لكن علشان انا لو مش همثل بقيمتي ومكانتي مش عايز أمثل انا تعبت جدا عشان اوصل اللي انا فيه بدات كومبارس لحد ما عملت لنفسي اسم ولو مكنتش هاخد حقي مش عايز».
وتطرق فلوكس إلى حديث محمد رمضان عن كونه «نمبر وان»، مؤكدًا أنه لا يؤمن بوجود فنان يحمل لقب الرقم واحد، موضحًا: «ما فيش حاجه اسمها نمبر وان هو بس يمكن عشان محمد مر بحاجات كتير علشان يوصل فا من جواه عايز يقول انا رقم واحد انا نجم ما فيش حاجه اسمها انا رقم واحد مكان في رشدي اباظه واحمد رمزي وعمر الشريف مفيش رقم ١».
واختتم حديثه بالإشارة إلى أن النجاح قد يصاحبه شعور الفنان بأنه يتعرض للمحاربة، ورغبته في إثبات قدراته ونجاحه، لكنه لا يعتقد أن محمد رمضان يقصد من وراء حديثه التقليل من الآخرين، قائلًا: «في اعمال حلوه واعمال وحشه لكن رقم واحد دي بس علشان عايز يقول انا جامد وانا نجحت واتحارب في الاخر ربنا ادينا البصيره ان اي حد بينجح بيتحارب وبيبقى شايف الحرب وشايل همها وعايز يثبت ان هو جامد لكن اعتقد مش قصده».
