دينا أبو السعود تتعرض لأزمة صحية : راضية بقضاء ربنا

كشفت الفنانة والإعلامية دينا أبو السعود، عن تعرضها لمشاكل صحية خلال الفترة الحالية، مما تسبب في ابتعادها عن الأضواء.

وكتبت دينا أبو السعود عبر حسابها الشخصي على فيسبوك : "ناس كتير بتبعتلي وتسألني أنت مختفية ليه؟، وناس تانية فاكرة إن حياتي كلها راحة ورفاهية وإن مفيش عندي هموم ولا مشاكل، بس الحقيقة كل إنسان عنده وجع وتعب محدش يعرف عنهم حاجة".

وأضافت : "أنا بطبعي مش بحب أتكلم عن مشاكلي ولا أشارك تعبي أو ظروفي الشخصية مع حد، وبحب دايمًا أظهر قدامكم مبتسمة وقوية".

وواصلت دينا أبو السعود : "لكن بقالي فترة مش كويسة صحيًا، والنهارده بعد التحاليل اكتشفت إن عندي مشاكل صحية محتاجة مني اهتمام وعلاج ومتابعة".

وأردفت : "يمكن دي المرة الوحيدة اللي أشارككم فيها حاجة خاصة بيا، علشان أقول إن مش كل ابتسامة معناها إن صاحبها مرتاح، ومش كل سكوت معناه إن الحياة وردي، فبلاش نحكم على حياة بعض من الصور والضحك والظهور على السوشيال ميديا، لأن كل واحد فينا بيخوض معارك محدش يعرف عنها حاجة".

واختتمت دينا أبو السعود : "الحمد لله على كل حال وراضية بقضاء ربنا وواثقة إن ربنا هيعدي الفترة دي على خير، محتاجة دعواتكم من القلب إن ربنا يتم شفائي على خير ويشفي كل مريض ويطمن قلب كل حد شايل هم أو وجع في صمت".