كنت هولع أنا وجوزي .. دينا أبو السعود تكشف عن تعرضها لحادث مريع
كشفت الإعلامية والفنانة دينا أبو السعود عن تعرضها وزوجها لحادث مروع، كاد أن يؤدي بحياتهما، وذلك عبر حسابها الشخصي على فيسبوك.
تعرض دينا أبو السعود وزوجها لحادث
وأشارت دينا إلى نشوب حريق في منزلها وانتشار الدخان به بشكل مفاجئ، لتقرر هي وزوجها أن يتكرا المنزل فورًا.
كنت هولع أنا وزوجي
وكتبت دينا أبو السعود عبر فيسبوك : "إمبارح حصل حاجة في لحظة كنت هولع أنا وزوجي .. إمبارح بعد مارجعت من مشوار النقابة كنت حاسة بتعب .. مش قادرة أحضر الغداء .. زوجي لما شافني تعبانة قام هو حضر الأكل وجابه على الأوضة .. أكلنا وقعدنا بعد الغدا ساعات بنتفرج على التلفزيون .. حسيت إني بتخنق قوي .. وزوجي بيتكلم في التيلفون ومش واخد باله .. فقولتله محمد في دخان أنا حاسة إن في حاجة بتتحرق قالي لا بيتهيالك .. فجأة لقينا دخان كثيف في الأوضة .. محمد قالي إيه الدخان ده وأنا عمالة أكح .. طلع على الطرقة بيصرخ وبيقولي قومي بسرعة إنزلي من البيت دلوقتي حالًا".
دينا أبو السعود تكشف تفاصيل تعرضها لحادث
وواصلت : "طلعت من الأوضة حسيت إن الموت جاي جاي لا ريب فيه .. في اللحظة دي .. لحظة إني بحاول أوصل لباب البيت ومش عارفة أخد نفسي .. ولا شايفة من الدخان .. البيت بيولع .. طلع محمد نسي الطاسة بالزيت النار حوالي 3 ساعات .. راح على طول قفل النار وفتح الشبابيك كلها .. بقوله إنت فين مش شايفاك .. قالي إنزلي إنتي دلوقتي حالًا أنا بفتح الشبابيك كلها .. بقوله لأ بلاش الشبابيك ليدخل صرصار .. علشان أنا بخاف قوي من الصراصير .. قالي صرصار إيه إحنا بنموت إنزلي بقولك .. نزلت وحصلني وقعدنا في العربة ساعة علشان نعرف ناخد نفسنا والدخان يمشي .. دلوقتي بأبص على الطاسة فحمة بسبب قوة الحرق .. بقول لنفسي لولا ستر ربنا ولو نقطة ماية نزلت إمبارح على الطاسة دي .. كنا ولعنا واتحرقنا بالحيا".
الحمد لله على الستر
واختتمت دينا أبو السعود : "دايمًا نحمد ربنا على الستر .. ربنا بيستر قبل الألم وقبل الندم وقبل الوجع .. الحمد لله على ستر لا نراه لكنه ينقذنا".
