كمال عطية ينتقد سؤال الممثل "حضرتك بتشتغل ايه؟": موجع أوي
أثار الفنان كمال عطية الجدل، بعد أن كشف عن مدى حزن أي ممثل يُسئل عن المهنة التي يمتهنها، وذلك من خلال منشور عبر حسابه الرسمي على موقع التواصل الإجتماعي فيسبوك.
كمال عطية يكشف عن شئ موجع لأي ممثل
وعلق كمال عطية قائلًا: “أى مهنة فى الكون بيبقي عادى جدا لما أى حد يسأل صاحب المهنة دى : حضرتك بتشتغل إيه؟، بيبقي سؤال طبيعى ، ويمكن كمان السؤال نفسه بيدى للى اتسأل مساحة بالإحساس بالذات عن الإعلان عن مهنته ، خصوصا لو كانت مهنة مرموقة، ماعدا مهنة التمثيل بيبقي سؤال بيوجع اوى لما حد يسأل ممثل : وحضرتك بقي بتشتغل إيه؟”.
تجربة كمال عطية مع تأخر الإنجاب
في سياق آخر، قد حرص الفنان كمال عطية أن يكشف لجمهوره عن تجربته ومعاناته مع تأخر الإنجاب، بالتزامن مع عيد ميلاد ابنه، وذلك من خلال منشور مطول عبر حسابه الرسمي على موقع التواصل الإجتماعي فيسبوك.
واوضح كمال عطية قائلًا: "استنيت سنين كتير عشان اكتب البوست ده، اتجوزت سنة 2006 ، وشبه كل الناس تقريبا بحلم بحتة عيل افرح بيه واربيه واتسند عليه لما أكبر ، وأنا أساسا من الناس اللى بتحب الأطفال اصلا ، أول ما اشوف أى طفل سواء أعرفه أو ما أعرفهوش ألاقى نفسي ببتسم له على طول وبعدين ألاعبه على قد ما أقدر فياسلام بقي لو الطفل ده إبنى، المهم بدأت الشهور تعدى ولسه مافيش أى حمل ، طبعا بدأت اقلق زى أى كائن حي ، ومش بس أقلق لا بقيت بتضايق جدا من سؤال الناس ليا أو لمراتى : ايه مافيش حاجة جاية في السكة كده ؟ عايزين نشوف لكم حتة عيل نفرح بيه ؟ وكأن الموضوع بإدينا واحنا اللى مش عايزين ، وبدأنا نروح لدكاترة ، أى حد يقولنا على دكتور نروحله وأى حاجة يطلبها الدكتور نعملها، وبدأت السنين تعدى وزاد القلق معاها وكمان زاد الضيق من أسئلة الناس لأن الواحد أصلا مابيفكرش غير في الموضوع ده في حياته ؛ زى المريض كده اللى مابيفكرش غير فى الألم ومابيصدق مثلا إنه ينام أو حاجة تشغله عن الإحساس بالألم ؛ فمع كل سؤال وتكراره واللى ممكن يجى في لحظة الواحد ماصدق أساسا انه مابيفكرش فيها وناسي للحظات ، خصوصا إن الكلام بقي بيضايق ؛ طبعا معظمهم إن لم يكن كلهم نيتهم خير بس معلش لكل إنسان طاقة ، يعنى يجى حد ويقولك إدعى ربنا كتير واتذلل له وعيط وانت بتدعى ؟ كنت ببقي عايز أرد عليه وأقوله ومين قالك إنى مابعيطش كل يوم ؟
