بصورة مع طليقها وابنتهما.. أسما شريف منير تحتفل بعيد ميلاد ابنتها |صور
احتفلت الإعلامية أسما شريف منير بعيد ميلاد ابنتها الثالث عشر، في حضور طليقها ووالد ابنتها، وذلك من خلال منشور عبر حسابها الرسمي على موقع تبادل الصور والفيديوهات إنستجرام.
رسالة أسما شريف منير للمقبلين على الطلاق
ووجهت أسما شريف منير رسالة خاصة لكل المقبلين على الطلاق، حيث قالت: “ السنة الـ١٣ للصورة اللي بقت من أحلى عاداتنا، صورة واحدة كل سنة، بس عمرها ما بتبقى نفس الصورة، إحنا بنتغير، ولارا بتكبر قدام عينينا، وكل سنة بنكتشف فيها نسخة جديدة منها، اهتمامات جديدة، شخصية بتتكون، وتفاصيل بنحب نشوفها وهي بتتغير سنة ورا سنة، ربنا يحفظك ويبارك لنا فيها وفي عمرها، ونفضل ناخد الصورة دي لحد ا الجامعة كمان يا رب، بس السنة دي أحب افكر اي حد بيعدي ب انفصال او طلاق إن الانفصال أو الطلاق مش لازم يتحول لمعركة، ومش لازم ولادنا يدفعوا تمن إن علاقة بين اتنين كبار ما كملتش، ممكن العلاقة تنتهي، لكن الاحترام ما ينتهيش، وممكن كل واحد يكمل حياته، يحب ويتجوز ويبدأ من جديد، من غير ما الطفل يحس إنه لازم يختار طرف، أو يحس بالذنب عشان بيحب كل الناس اللي في حياته، وأنا الحمد لله ممتنة جدًا إن لارا حواليها ناس بيحبوها بجد .”
تماسك عائلة أسما شريف منير بالرغم من الانفصال
واستكملت أسما شريف منير حديثها قائلة: “أبوها عايز يشوفها مرتاحة وناجحة وسعيدة، و احمد بيحبها بجد وعايز يشوفها مرتاحة وناجحة وسعيدة، وأنا في الآخر كل اللي يهمني إن بنتي تكبر وهي عارفة إن حب الناس ليها مش منافسة، وإن مفيش حد محتاج ياخد مكان حد، كل واحد له مكانه، وكل واحد له دوره، والأهم إن هي تبقى في النص محاطة بالحب، مش محطوطة في النص بين خلافات الكبار، يمكن دي أهم حاجة أحب أفكر بيها أي أب وأم انفصلوا حطوا ولادكم قبلكمـ احترموا بعض عشانهم، وسيبوهم يحبوا كل الأطراف من غير خوف ولا إحساس بالذنبـ وفي الآخر، يمكن أنجح حاجة ممكن نعملها بعد ما علاقة تنتهي، إننا منخليش معاها إحساس الأمان عند ولادنا ينتهي، الحمد لله… الحمد لله على لارا، وعلى كل سنة جديدة بناخد فيها الصورة دي، وعلى إننا لسه بنشوفها بتكبر قدام عينينا وإحنا كلنا بنحبها.”
