بعد انتهاء مسلسل بنج كلي.. أحمد شاهين: "مبحبش أروح مستشفيات" |حوار
تصدر الفنان أحمد شاهين تريند محركات البحث بعد أن تألق في مسلسل بنج كلي بتجسيد شخصية الدكتور عصفور “طبيب التخدير المدمن”، وجاءت تعليقات وإشادات عديدة بتألقه ومدى اهتمامه بالتفاصيل الدقيقة.
وتواصل موقع نيوز رووم مع الفنان أحمد شاهين ليكشف لنا كواليس مسلسل بنج كلي، وإليكم نص الحوار:
س: كيف جاء الترشيح لدور عصفور وما الذي جذبك للدور؟
ج: الترشيح جاء من أستاذة نادين خان، وأي حد يتمنى العمل مع أستاذة نادين، هي أستاذة جميلة وحاجة تشرفني جدًا، وكمان عرفت أن المسلسل بطولة دياب وسلمى أبو ضيف والاتنين بحبهم على المستوى الفني وعلى المستوى الشخصي اتمنى العمل معاهم، مترددتش للحظة.
س: حدثنا عن كواليس المسلسل خاصة أن كلها في مستشفى، وكيف التعاون مع سلمى أبو ضيف؟
ج: الكواليس كانت جميلة، وسلمى أبو ضيف جميلة ودؤوبة وبتذاكر، وبتراجع كويس ومهتمة جدًا بشغلها، وحصلت بينا كيميا لطيفة وكنا بنشتغل سوا على المشاهد قبل ما نصورها، وده كان حلو جدًا ومشاهدنا كلها طالعة حلوة وبشكل لطيف.
س: حدثنا عن موقف طريف حصل في المستشفى؟
ج: أحنا كنا غفي عملية وبنستئصل جزء من جسم المريض، وبعدين أستاذة نادين كانت ساعات بتوقف عشان نعيد لو في حاجة مش عاجباها، المهم وأحنا بنصور المريض نام وبدأ يشخر فكلنا قعدنا نضحك وصحيناه.
س: ما الذي تغير في ذهنك عن الأطباء ومجال الطب؟
ج: مافيش أي حاجة اتغيرت، أنا شايف أنها مهنة سامية جدًا مهنة مهمة جدًا، رسالة لازم نكون فاهمينها جدًا وفاهمين أهميتها، ولو على عصفور كل مهنة فيها الحلو والوحش، نورنا على الأجزاء المظلمة ولكن على المستوى الشخصي أنا أعرف أطباء تخدير محترمين وبيتقوا ربنا.
س: هل أحمد شاهين من النوع لو تعب ياخد مسكن ويتعايش ولا بتحب تروح لأطباء؟
ج: لا أنا لو تعبت محبش أروح لدكاترة خالص ولا مستشفيات، وباخد مسكنات عادي.
س: حدثنا عن كواليسك مع ناندا محمد؟
ج: ليا مشهد حلو أوي مع ميس نادية في العيادة في الصيدلية وأنا بقولها أني شاكك فيها، ناندا ممثلة شاطرة جدًا وحبيت الشغل معاها ومحدش حس أنها سورية مش مصرية.
س: هل أحمد شاهين لديه الحاسة السادسة كما كان لدى عصفور؟
ج: أه عندي الحاسة السادسة أنا برج السرطان وبحس شوية حاجات الناس ممكن متحسهاش وبشم حاجات كتير هتحصل من على بعد، وببقى فاهم اللي قدامي وبحس حاجات كتير لله في لله.
س: ما رأيك في علاقة عزازي ودعاء؟
ج: اكتشفنا في الأخر أنهم بيحبوا بعض، في ناس بتخاف من الارتباط ومن القرب وعزازي كان من الناس دي، هو مكنش عارف يعمل ايه، أنا متمناش أن ده يحصل ونفسي لو حد بيحب حد يقوله أنه بيحبه، ليه نتقل على بعض ملهاش لازمة.
س: ما رأيك في تجربة ال١٥ حلقة وهل تعتقد أنها أفضل من ال٣٠ حلقة؟
ج: تجربة حلوة جدًا تتيح فرص لممثلين كتير، وتتيح فرص التوزيع السريع، والإيقاع السريع بسبب أن ورقه سريع بدل ما الجمهور يمل ويتفصل، لأن لو الجمهور وقع مننا عمرنا ما هنعرف نسحبه تاني، ال15 حلقة دي اختراع، ولو 10 حلقات هيبقى أحلى.
