النائب باسم كامل: الإيجار القديم ظلم للمالك و المستأجر.. وأطالب بتعديلات منصفة

انتقد النائب باسم كامل الأمين العام للحزب المصرى الديمقراطى الاجتماعى، وعضو مجلس الشيوخ، آلية احتساب استهلاك الكهرباء للمواطنين الذين كانوا يحصلون على الكهرباء بنظام «الممارسة»، قبل تركيب العدادات الكودية، متسائلا عن أسباب محاسبتهم على أعلى شريحة استهلاك بدلا من تطبيق الشرائح وفقا لمعدلات الاستهلاك الفعلية.

وأوضح خلال حديثه في بودكاست «راقب نائب»، المذاع على كواليس برلمانية: «المواطن اللي ما عندوش كهربا في البيت، بيعملوا له حاجة اسمها ممارسة، وبيقولوا له: أنت مخالف، بس هنديك كهربا.. متابعا: الممارسة دي كانت بتخلي كل شقة تدفع مبلغا ثابتا، مثلا ألف جنيه، من غير عداد.. يعني سواء استهلك كتير أو استهلك قليل، بيدفع نفس المبلغ».

وأضاف: «ده كان بيعمل أزمة، لأن كل واحد دافع ألف جنيه، وبالتالي مش هيفرق معاه يستهلك قد إيه. لو عنده تكييفات هيشغلها كلها، ولو عنده سخان هيشغله، لأنه في الآخر هيدفع ألف جنيه سواء استهلك أو ما استهلكش».

ارتفاع معدلات الاستهلاك في بعض المناطق

وأشار إلى أن الجهات المعنية اكتشفت ارتفاع معدلات الاستهلاك في بعض المناطق مقارنة بالمبالغ التي يتم تحصيلها بنظام الممارسة، قائلا: «لقوا إن عندهم معدلات استهلاك أعلى بكتير جدا من الفلوس اللي بتتجمع، وبالتالي كان لازم يبقى فيه حل، والحل إننا نركب لهم عدادات».

وتابع منتقدا طريقة تطبيق النظام الجديد: «طيب العداد ما هو البيوت بتركب لها عدادات، والبيوت فيها شرائح. الغلبان اللي بيستهلك 100 كيلو غير اللي بيستهلك 500 كيلو غير اللي بيستهلك ألف كيلو، والشريحة اللي بيتحاسب عليها الناس مختلفة.. طب ليه لما قررنا للناس دي نلغي فكرة الممارسة ونركب لهم عدادات، حطينا كل المواطنين دول على أعلى شريحة؟ إيه المنطق؟».

وأوضح أن هذا القرار أدى إلى زيادة كبيرة في قيمة الفواتير بالنسبة لبعض المواطنين، قائلا: «اللي كان بيدفع ألف جنيه مثلا، نفسه بقى بيدفع 3 آلاف جنيه، لأنه اتحاسب على أعلى شريحة في استهلاك الكهرباء.. يعني اللي استهلك قليل واللي استهلك كتير بيتعاملوا على أعلى شريحة».

واعتبر أن في ذلك «إجحافا بحق المواطن»، متسائلا عن سبب عدم تطبيق نظام الشرائح بصورة طبيعية على مستخدمي العدادات الكودية.

وأوضح أن نظام الممارسة كان يستخدم في بعض الحالات التي تكون فيها المنازل مخالفة أو لم تدخل إليها الكهرباء بشكل رسمي، قائلا: «الناس اللي بتبني البيوت لسه، أو البيوت اللي فيها مخالفة واتبنت ولسه الكهرباء ما دخلتش، والناس عايزة تسكن، بيدخلوا لهم الكهرباء بشكل غير رسمي، وبيعملوا لهم ممارسة لغاية ما يتم تركيب العداد أو إنهاء إجراءات التصالح».

محاسبة أصحاب العدادات الكودية مثل باقي المواطنين

وشدد على أن الحل، من وجهة نظره، يتمثل في محاسبة أصحاب العدادات الكودية وفق شرائح الاستهلاك المعمول بها لباقي المواطنين، قائلا: «المشكلة سهلة. الحكومة أو المجلس، حضرتك بتاخد مطالبات من أكتر من زميل من زملائنا في مجلس النواب، إن العدادات الكودية دي تتعمل بشرائح زي البيوت العادية، وكل واحد يستهلك يدفع على قد استهلاكه».

وأكد أن الهدف من ذلك هو تحقيق العدالة في احتساب استهلاك الكهرباء، بحيث لا يتحمل المواطن الذي يستهلك كميات قليلة تكلفة الشريحة الأعلى لمجرد كونه من أصحاب العدادات الكودية.