«الحكومة أخدت فلوس المعاشات».. باسم كامل يوضح مشكلة التأمينات

قال النائب باسم كامل عضو مجلس الشيوخ: «إحنا في مجلس الشيوخ جالنا مقترح تعديل قانون التأمينات والناس كانوا متعشمين إن الموضوع هيتناقش.. وفي الأخر طلع الحكومة عندها مشكلة من وقت لما أخدوا فلوس المعاشات والتأمينات أيام يوسف بطرس غالي وكانوا 400 مليار جنية واتضمت على الموزانة العامة وراحت».

وأضاف، خلال استضافته في بودكاست «الكلام على إيه» مع الإعلامية نهلة عامر، المذاع عبر نيوز رووم: «حاليا هما بيبحثوا إزاي يزودوا دخل صندوق المعاشات مش إزاي المواطن ياخد معاش يضمنله عيشة كريمة، السبب في المشكلة إن الحكومة أخدت فلوس المعاشات».

وخلال الحلقة، طرح النائب باسم كامل رؤية متكاملة لحل أزمة الإيجار القديم، حيث أكد كامل على ضرورة التوازن بين حق المالك الأصيل في استغلال وحدته وبين البعد الاجتماعي للمستأجر، مشددا على أن الهدف هو عدم تشريد أي مواطن، قائلا: «الللي قاعد في عقار ميتنقلش منه لحد ما يموت».

حق المالك ومعاناة المستأجر

وأوضح باسم كامل: «أنا صاحب عقار والشقة بتاعتي والمفروض إني آخد حقي وآخد الإيجار المنطقي اللي يعيشني لكن في أصحاب المعاشات مش هيقدر يدفع الإيجار هيعمل إيه هيقعد في الشارع؟».

وأشار إلى أن الدولة اتخذت إجراءات لمعالجة جانب من الأزمة، لا سيما فيما يتعلق بالعمارات التي كانت تحقق عوائد محدودة للملاك: «الدولة المصرية حلت مشكلة كبيرة إن صاحب العمارة اللي عنده فيها 10 شقق كل شقة بتجيبله 20 جنيه والعمارة كلها تجيبله 300 جنيه إيجار.. دلوقتي الشقة بالتعديل الحالي بتجيبله 500 أو 1000».

مقترح الصندوق التكافلي

وعن الحل العملي، اقترح كامل تدشين صندوق لدعم العجز الإيجاري، يتم تمويله من العائدات الجديدة للملاك الذين تحررت عقودهم، قائلا: «في ناس مشاكلها هتتحل فورا والعقد هيتحرر والشقة اللي كانت لـ 50 جنيه تلاقيها بقت بـ 5000 جنيه، فـ أنا بقترح أن الناس اللي بتاخد الإيجارات دي ناخد منهم نسبة لصندوق يغطي العجز بتاع الناس اللي مش هتقدر تدفع الإيجار وأصحاب المعاشات والأرامل والمطلقات».

دراسة الحالات بعناية

وأكد النائب على أن تنفيذ هذا المقترح ليس مستحيلا إذا توافرت الإرادة والبيانات الصحيحة، مؤكدا: «لازم الحالات دي تدرس وده مش صعب، والصندوق هيجيب من الناس اللي بعد ما كان بيجيله 50 جنيه من الشقة بقى يجيله 5000 جنيه».

وفي سياق آخر، كشف المهندس باسم كامل عضو مجلس الشيوخ، عن فكرة الأحزاب المعارضة، قائلا: «الأحزاب مقسمة إما مع معارض أو في الحكم، ولا يوجد تصنيف ثالث، وهذا في البلاد التي تتمتع بالديمقراطية».