عمرو حلمي يكشف كواليس دخوله التمثيل عن طريق بنج كلي |حوار
تصدر الفنان عمرو حلمي تريند محركات البحث خاصة بعد تجسيده لدور الدكتور حاتم رئيس قسم جراحة الطوارئ بـ مسلسل بنج كلي الذي يٌعرض حاليًا على منصة شاهد، وبعد تألقه حرص موقع نيوز رووم على أن يتواصل معه ليكشف لنا عن كواليس ترشيحه.
وإليكم نص الحوار:
س: ما الذي جذبك للمشاركة في مسلسل بنج كلي؟
ج: نفسي أمثل من وانا عندي 17 سنة خدت ورش تمثيل مع أستاذ أحمد كمال، كانت في أستوديو البطريق مع محمود حميدة، كنت بحاول أفتح لنفسي سكك في التمثيل، كان حلمي من الطفولة، أستاذ مودي شاهين الكاستينج دايركتور رشحني للدور ده، وأستاذة نادين خان وكنت خايف أن الدور يكون صغير، وكنت فرحان جدًا بسبب تمسك أستاذة نادين بيا، وهو دور حلو وموجود في معظم الحالات أو كلها، اللي جذبني أنه دكتور وده بعيد تمامًا عني أنا لا افقه شئ في الطب، بس حسيت أنه ممكن يخرج الحتة الرزينة اللي جوايا لأني مش رزين خالص في الحقيقة، أنا شوية مشاغب حتى في برامجي، وطالع دكتور متنمر وبيطبل لعزازي.
س: كيف كانت الكواليس خاصة لأن التصوير كله كان في مستشفى؟
ج: كانت أستاذة نادين عايزانا دايمًا طالعين في ضهر بعض في المستشفى فهتلاقوا كذا مشهد أحنا كلنا طالعين حتى لو ظاهرين ورا الأبطال، مش لازم يكون متسلط عليه الكاميرا بس كانت عايزانا كلنا موجودين، فأحنا كنا عشرة وعلطول قاعدين سوا الاجواء كانت لطيفة جدًا وشركة الإنتاج كانت مريحة جدًا عمرنا ما كنا بنروح اللوكيشن وأحنا مضايقين، سلمى أبو ضيف كانت في منتهى اللطف معانا كلنا، دياب دمه خفيف جدًا وكان بيغني علطول في الكواليس معانا، اتعلمت منه كتير.
س: ما رأيك في الأعمال ال١٥ حلقة؟
ج: بحبها جدًا لأنك بتاخد كبسولة مركزة من غير مط، بس كان نفسي بنج كلي يبقى 30 حلقة لأن أنا لسه جوايا أسئلة الناس دي هتروح فين، وبتمنى يكون في موسم تاني.
س: كيف ترى النقد الذي يوجه للمسلسل والهجوم عليه بسبب إشكاليات طبية؟
ج: مضايق لأن عمر ما كانت الدراما حاجة وثائقية، الأعمال الوثائقية بندقق فيها كده، أنا في الصناعة من زمان ومش معقول كم التدقيق اللي مطلوب مننا في عمل درامي، هو مش مكتوب أنه واقعي 100%، الهجوم غير مبرر، مافيش مانع للنقد ولكن النقد اللاذع أو اللي فيه تجاوزات ده مش مقبول، كان معانا دكاترة حقيقين وكانوا بيعدلوا أي حاجة غلط بتحصل.
س: ما رأيك في ردود الفعل؟
ج: أنا مبسوط جدًا بيها الناس بقيت كلها بتتكلم عنه، المسلسل تريند من أول حلقة، أنا مبسوط أن الناس عرفت أني بمثل من المسلسل ده، والناس اللي عرفاني بقيت تقولي يا دكتور حاتم، وفي رسالة جاتلي واحدة بتستشرني في استشارة طبية، وفي مسدجات الناس فكراني دكتور بجد وبيقولولي هايل أنت طبيعي قدام الكاميرا كنا فاكرينك شيف بس.
س: لو رجع بيك الزمن بعد بنج كلي هل من الممكن أن تمتهن مهنة الطب؟
ج: كنت هبقى دكتور نفسي أكيد، دكتوري النفسي بيقولي لو معاك درجة علمية كان هيشغلني معاه، انا بحب علم النفس وبحب اقرأ كتب وبحب الكرير ده، عندي أكتر من 130 كتاب عن الشخصيات وعلم النفس وإنشاءالله ده هيفدني في التمثيل أكيد عشان أعرف احلل الشخصيات.
س: من وجهة نظرك، هل بالفعل هناك تفرقة وعنصرية بين الرجال والسيدات في بعض المهن؟ وما هو تعليقك عليها؟
ج: في كل المهن مش الطب بس وموجودة طبعًا حتى في مهنة الطبخ، ونفسي الستات تغزو مجال الطبخ أه معظم الشيفات الناجحين رجالة ولكن الستات شاطرين.
س: حدثنا عن بداية دخولك لمجال التمثيل؟
ج:أنا سيبت بيت أهلي وأنا عندي 16 سنة عشان أبني نفسي بنفسي وأبقى شخص عصامي، التمثيل كان عائق بالنسبالي وأنا صغير، لأن أجره بيبقى قليل أوي، لما كونت نفسي رجعت تاني لشغفي، وبدأت اخد ورش بقالي 4 سنين تقريبًا مع كل اللي بيدوا ورش أجانب ومصريين، أنا مستخدمتش أي واسطة مع أني عارف ناس كتير من الوسط بشكل شخصي، كان ليا دور في الهوى سلطان وجولة أخيرة وبعد ما مضيت الموضوع كان بيتعطل عشان اسباب إنتاجية أو تصاريح، ولكن أنا بشكر جدًا مودي شاهين لأنه مؤمن بيا وبشكره على كل الفرص اللي ادهاني، وبشكر أستاذة نادين طبعا لأنها أدتني فرصة مهمة وكبيرة زي دي.
