"مصورناش في مستشفى".. ديفيد برتي يكشف كواليس مسلسل بنج كلي |حوار
تصدر الفنان ديفيد برتي تريند محركات البحث، خاصة بعد تألقه في تقديم شخصية رحيم في أحداث مسلسل بنج كلي، الذي يُعرض حاليًا على منصة شاهد، ولذلك حرصًا على الكشف عن كواليس تحضيره للشخصية، تواصل موقع نيوز رووم مع ديفيد بيرتي.
وإليكم نص الحوار:
س: كيف تم ترشيحك للدور وما الذي حمسك للمشاركة؟
ج: الدور جالي بترشيح من أستاذ مودي شاهين الcasting director وتحمست جداً للدور لأن شخصية رحيم بتحرك جزء كبير من أحداث المسلسل، شخصية مثيرة للإهتمام جداً وفيها مساحة حلوة للتفاصيل وكمان ليها مساحة ظهور كويسة جداً خاصةً إن ده أول عمل درامي أشترك فيه.
س: حدثنا عن كواليس العمل خاصة أن التصوير تم في مستشفى وسط مرضى؟
ج: الحقيقة احنا ماكناش بنصور في مستشفى لكن في locations معمول ليها تصميم وديكور عشان تطلع بصورة مستشفى الأمل اللي احنا شوفناها في المسلسل
ولكن فعلاً من دقة الديكور حتى واحنا شغالين كنت اوقات بحس اننا فعلاً في مستشفى.
س: أكشف لنا شئ مميز في دياب وسلمى أبو ضيف بما انك كنت تشاركهم معظم المشاهد؟
ج: طبعاً شرف كبير ليا إني أكون فرد في وسط كرو عظيم زي ده وخاصةً دياب وسلمى، سلمى كان ليا الحظ اني اكون معاها في مشاهد متعددة ومن أجمل الحاجات فيها إنها شخص متواضع جداً وودود، ممثلة ممتازة ومركزة في شغلها اوي وبتخلق حواليها جو جميل لكل اللي شغال معاها، وده ساعد جداً في الكيميا اللي كانت بيننا في المشاهد اللي كانت بين دكتورة دعاء ومستر رحيم، بالنسبة لدياب ف مع ان مشاهدي معاه أقل لكنه كان mentor جميل ليا، اداني نصايح وtips ليها علاقة بالحركة وعلاقتنا بالإضاءة وماكانش بيبخل ابداً بأي نصيحة. اتعلمت منه كتير وده غير إن دمه خفيف جداً وحضوره جميل في وسط اجواء التصوير.
س: ما هو أصعب مشهد مر عليك في كواليس مسلسل بنج كلي؟
ج: في مشاهد كتيرة كانت مهمة بالنسبة لشخصية رحيم ولكن المشهد اللي كان بين رحيم ودعاء في العربية في الحلقة ٤ كان من اهم المشاهد بالنسبة ليا لأن دي المرة اللي بنعرف فيها فعلاً عن رحيم قصته واحلامه وظروفه وبيفتح فيها قلبه لدكتورة دعاء، خاصةً كمان إن الحوار فيها كان طويل نسبياً، كمان حاضر في بالي مشاهد حلقة ١١ لأن فيها بنشوف رحيم في مشاكل الخصومات والجزاءات اللي وقعت عليه وبتشكل ليه و مادياً وعملياً مشكلة كبيرة.
س: لو الزمن عاد بيك بعد بنج كلي ممكن تفكر أنك تدرس طب وتشتغل في التخصص ده؟
ج: الطب مهنة سامية ومجال مثير جداً للإهتمام وبحب اقرأ عنه أوقات ولكن كوظيفة هو رحلة طويلة وشاقة جداً فالحقيقة بشوف اني صعب ادي التكريس الكامل ده لحياتي في اتجاهها.
س: هل مسلسل بنج كلي كان أول عمل تشارك به في مجال التمثيل؟
ج: لا هي مش اول تجربة في العموم ولكن هو اول مسلسل درامي اشترك فيه، كان ليا تجارب متنوعة في المسرح مع فرق مختلفة، وكمان شاركت في برنامج مقالب "الهبيدة" في رمضان ٢٠٢٥، ومجموعة من اسكتشات الsocial media اشهرهم "المتشبثون"/"الطبقة المتشبثة"، كمان ليا مشاركات متنوعة في عالم الدوبلاج والتمثيل الصوتي.
س: ما هو أكثر رد فعل أثر فيك بعد دور رحيم؟
ج: ردود الأفعال من الجمهور كانت اكبر بكتير من اللي ممكن اتخيله الحمد لله الناس حبت شخصية رحيم وحسوا بتواصل معاه ودي بالنسبة ليا اجمل حاجة، وطبعاً في ردود افعال جميلة من اساتذة كتير من الوسط الفني تواصلوا معايا وشجعوني وكانوا فرحانين جداً بالآداء وده شرف كبير ليا اكيد الحمد لله.
