إيناس عز الدين تكشف عن أصعب فترة مرت عليها: "بنتصرف بغباء"
كشفت المطربة إيناس عز الدين عن أصعب فترة مرت عليها بعد وعكتها الصحية، وقيامها بإجراء عملية جراحية في عينيها بنفس التوقيت العام الماضي، وذلك من خلال منشور عبر حسابها الرسمي على موقع تبادل الصور والفيديوهات إنستجرام.
أصعب فترة مرت على إيناس عز الدين
وعلقت إيناس عز الدين قائلة: “الحفلة دي من سنة تقريباً و بعيداً عن انها من احب الحفلات لقلبي بس ذكراها كانت صعبة جداً و بتعرفني قد ايه انا جامدة جداً وكمان عندية و راسي ناشفة جداً، الحفلة دي تاني يوم ما عملت عملية كبيرة في عيني بعد ما حصل فيها قطع في الملتحمة وكاد ان يصل للقرنية و اتعالجت غلط و للاسف الجرح اللي في عيني اتسع و حالته ساءت جداً و كدت ان افقد البصر في عيني اليسرى و لكن قدر و لطف، و طبعاً رفضت اعتذر عن الحفلة و طلعت المسرح بدون أي ميك أب نهائياً ما عدا تنت على الخدود و الشفاه فقط و عيني طبعاً كانت شكلها مرعب و لونها احمر زي افلام الرعب بعد الجراحة، وكان اصعب ما في الموقف هو اني اتعرض للضوء المباشر على المسرح و اكشف عيني و اشيل الضمادة تاني يوم العملية مباشرة و انا لسه فيا غرز و المفروض كنت افضل اسبوعين بالضمادة ومش بس كده، ده تاني يوم الحفلة دي سافرت علشان ابدأ موسم حفلات الساحل اللي استمر ٣ شهور متواصل، والله ربنا بيلطف بينا احياناً رغم اننا بنتصرف بغباء”.
هوية زوج إيناس عز الدين
في سياق منفصل، كشفت المطربة إيناس عز الدين عن هوية زوجها، بعدما حصدت العديد من الانتقادات لفارق السن بينهما، وذلك من خلال منشور عبر حسابها الرسمي على موقع التواصل الإجتماعي فيسبوك.
حيث قالت إيناس عز الدين في منشورها: “جماعة أنا متجوزة دكتور أحمد قمر مش دكتور عمرو الليثي خالص والله و هو حتى مش شبهه و النعمة، و نقطة تانية جوزي الفرق بيني و بينه ٨ سنين بس مش متجوزة راجل كبير وأنا عيلة صغيرة علشان الواحد بيقرأ العجب و جوزي مش عجوز اصلاً ولا انا صغيرة بضفاير انا بس اللي عيلتنا كلها كل ما نكبر شكلنا يصغر و علشان انا بس اللي شكلي مسخوطة، انا ٣٠ سبتمبر اللي جاي هكمل ٣٩ سنة، هو بس اللي مش بيصبغ زيي ومن زمان عنده شيب مبكر من وهو في العشرينات لكن هو حبيبي شباب ربنا يبارك في عمره، و نقطة تالتة احنا مش عرسان جداد احنا من قديم الأزل مع بعض من العصور الوسطى، ١٧ سنة و مكملين بس قولوا يارب، و دول شوية صور لينا مع بعض على مدار عمرنا هتلاقوا فيهم صور كتير وهو صغير وانا اللي كبيرة ايام ما كنت كبيرة، و صور بعد ما بقيت ڤامباير وهو كبر و انا صغرت، انجوي يا وظاويظ”.
