منة القيعي تكشف كواليس «اختياراتي مدمرة حياتي»: لا تعبر عن تجربة شخصية

كشفت الشاعرة الغنائية منة القيعي تفاصيل رحلتها مع كتابة الأغاني، وتأثير أسرتها على موهبتها، مؤكدة أن الكتابة جزء أساسي من حياتها منذ طفولتها.

أغنية «اختياراتي مدمرة حياتي»

وتحدثت منة القيعي، خلال لقائها مع الإعلامي معتز الدمرداش في برنامج «ضيفي مع معتز الدمرداش»، عن أغنية «اختياراتي مدمرة حياتي»، موضحة أنها لا تعبر عن تجربة شخصية لها، وإنما جاءت من مواقف وهزار متداول بين الأصدقاء، قائلة: «أنا دايما لما بكتب، أنا بس هقول على حاجة، هي الأغنية دي الناس دايما بتسألني الأغنية دي بتعبر عنك؟ لا، هي مش أغنية شخصية بس هي بتعبر عن كل الناس لما بيجوا يهزروا على نفسهم».

تعبير عن مواقف الناس

وأضافت: «دايما تلاقي مثلا البنات في بينهم هزار، والأغنية جت من هنا، إنه أنا وأصحابي والبنات لما يجوا مثلا يهزروا، ممكن واحدة صاحبتي تبقى بتهزر معايا تقولي أنا حاجة اسمها مصطلح اسمه كريب ماجنت  اللي هو دايما بنجذب للناس الغريبة».

وتابعت: « دايما بنجذب للمواقف الغريبة، فده حاجة، مصطلح موجود في الشارع، الناس دايما بتهزر على نفسها بتقول كده، واحدة مثلا يا تبقى اتخطبت أو ارتبطت بإنسان وطلع إنه مثلا لا يصلح ليها، أو قصص يعني ممكن تبقى طريفة، حاجات ليها علاقة على فكرة باختيارات في الشغل أو على الصحاب».

ارتباط الجمهور بالأغنية 

وأوضحت منة أن أكثر ما فاجأها هو ارتباط الجمهور بالأغنية من الناحية الشخصية، قائلة: «أكتر حاجة اكتشفت إن الناس واخدة رابطة الأغنية دي بيها علاقات شخصية أو صحاب، أو صداقات».

وعن فكرة «اختياراتي مدمرة حياتي»، قالت: «الجملة دي كانت في دماغي وكنت محوشاها بقى لي كتير، علشان أنا حاسة يعني اختياراتي مدمرة حياتي، أنا حسيت إن ده إفيه ممكن يبقى دمه خفيف وناس كتير بتقوله أوريدي عن نفسها».

وأكدت أنها لا تعتمد على اختراع أفكار بعيدة عن الناس، موضحة: «أنا مش بخترع حاجة، أنا دايما بشوف الناس إيه الحاجة الكومن اللي ناس كتير ممكن يبقوا حاسين بيها سوا، سواء على قصص مختلفة، أو إيه الحاجة اللي ناس كتير بتهزر فيها بس مفيش حد فكر يقولها، هي دايما بتيجي من هنا».

بداية كتابة الشعر في سن 11 عام

وخلال اللقاء، كشفت منة القيعي أنها بدأت كتابة الشعر في سن الحادية عشرة، موضحة أن الموهبة كانت موجودة داخل أسرتها، وأن أفراد عائلتها جميعا لديهم علاقة بالكتابة والموسيقى.