منة القيعي تكشف كواليس كتابتها للأغاني: «أنا في حالة بحث 24 ساعة»
تحدثت الشاعرة الغنائية منة القيعي عن طبيعة عملها والجانب المختلف في حياتها المهنية، موضحة أنها لا تملك مفهوم الإجازة، حتى خلال وجودها في الساحل الشمالي، وذلك خلال لقائها مع الإعلامي معتز الدمرداش في برنامج «ضيفي مع معتز الدمرداش».
الشغل ميزة وعيب
وقالت منة القيعي: «أنا أولا شغلي فيه ميزة وعيب، الميزة إني أنا مش مضطرة أكون في حتة، يعني مش مضطرة أكون في مكان معين، إلا لحظات التسجيل، بنزل أروح الاستوديو أحضر التسجيل، أو عندي بريزنتيشن بروح أحضرها. غير كده، وأنا بكتب، ممكن أكتب من أي حتة».
وأضافت: «فأنا ماعنديش مشكلة إن كراستي في إيدي، أنا بكتب في كراسة، كراسة وقلم وكده ما بكتبش ديجيتال، يعني، إلا لو في حتة ومعيش ورق وقلم، فكراستي في إيدي، وممكن أكتب من أي حتة. فدي الميزة، ممكن كل صيف بقى أسافر أقعد في الساحل لغاية ما أقرر أرجع».
تكرار نجاح أغنية
وتطرقت منة القيعي إلى فكرة الإلهام وكيف تأتيها الكلمات والأفكار، قائلة: «هو أصلا الموضوع كله... هي حاجة مش عايزة أقول مالناش يد فيها، عشان بس هي حاجة أنا ماليش يد فيها قوي، يعني أنا في ساعات بسمع أغاني، أقول: أنا كتبت، أنا قلت الكلمة دي ليه؟ ولا إزاي أصلًا أنا عرفتها؟ منين؟ طيب، ماعرفش، يعني».
وتابعت: «يعني في أوقات... أو الموضوع ده إزاي في الوقت ده جالي بالإحساس ده؟ الأغنية دي مش شبهي مثلًا».
وكشفت عن محاولتها تكرار نجاح أغنية «زي اليوم الحلو ده»، موضحة أن الطلب تكرر عليها بسبب طبيعة الأغنية المبهجة وقدرتها على ملاءمة الأعمال المختلفة، قائلة: «أغنية «زي اليوم الحلو ده» أنا حاولت، على فكرة، أعمل زيها تاني. اطلبت مني كتير، على أساس إن هي ماشية على أي حاجة وشغالة في أي حتة، وفي أي حاجة هتحطها في فيلم هتمشي، هتحطها في إعلان هتمشي».
تقديم أفكار جديدة
وأكدت منة القيعي أنها تفضل تقديم أفكار جديدة بدلا من تكرار تجربة سابقة، قائلة: «بس في نفس الوقت، ما هو أنا أصلًا ببقى مختلفة مع الطلب. يعني لما بيجي لي حد بيقول لي: «عايزين نعمل حاجة زي اليوم الحلو ده»، فبحس: ليه؟ طب ما نعمل حاجة جديدة؟ يعني حاجة تانية، مبهجة كده وفرحانة وكل حاجة، بس بنقول حاجة تانية».
