محمد عوف لـ ملكة التريندات:مش لازم العروسة تجيب ميكب أرتست في الفرح ونوفر فلوس
علق مدرب كمال الأجسام محمد عوف، على أسعار حفلات الزفاف خلال الفترة الحالية، مؤكدا أنها أصبحت مبالغ فيها وغير منطقية، وقال: «لما قلت بلاش ندفع فلوس في ميك أب أرتست واشتري مكياج واتعلمي تحطي لنفسك وبلاش فستان غالي، كان علشان أنا بقابل شباب كتير بشتكي من السعار لكنها بتدفع علشان متبقاش بخيلة».
وأضاف، خلال استضافته في برنامج «ملكة التريندات» المذاع عبر نيوز رووم، مع الإعلامية سارة مكي: «لو الراجل رفض يدفع مش هيكون بخيل، لكنه ممكن بدل ما يعيش يوم ممكن يعيش شهر ويسافر مثلا في شرم أو تركيا».
وتابع: «المصاريف مبالغ فيها جدا جدا بجد والبنات كمان بيتضحك عليهم، وفي واحدة قالتلي عادر ما الراجل بيشطب الشقة ما يدفع، لكن المصاريف لا تقارن طبعا ومرحلة الغلاء اللي إحنا فيها الشاب بيتداين علشان ساعتين».
وأردف: «كمان مع ظهور الفيلر والحاجات دي المصاريف زادت جدا جدا، والصرف على الجيم مش زي ده خالص.. الجيم بيفيدني صحيا ومظهر وعضلات وحاجة هتستمر معايا فترة طويلة.. وأنا مش بقول نمنع الأفراح بقول نقلل التكلفة بس».
وخلال الحلقة، وجهت الإعلامية سارة مكي، مقدمة البرنامج، سؤالًا إلى إيمان الأباجوري بشأن موقفها إذا اشترط عليها العريس تقليل تكاليف مستحضرات التجميل وشراء فستان زفاف بإيجار منخفض التكلفة.
أهمية التعبير عن المشاعر بالنسبة لها.. الجوازة لازم يبقى عقلي وقلبي موافق عليها
وأكدت إيمان الأباجوري، استشاري العلاقات، أن الرجل الذي تقبل الارتباط به لا يمكن أن يطرح عليها مثل هذا العرض.
وقالت إيمان الأباجوري إن موقفها سيكون واضحًا في هذه الحالة، قائلة: «لو عريس متقدم لي، هقول له: عيد الجملة تاني»، موضحة أنه إذا أصر على عدم توفير فستان مناسب لها، فسترفض الارتباط به، مضيفة: «مفيش إيمان، مع السلامة».
اختيار شريك الحياة بالنسبة لها لا يعتمد على الحب
وأوضحت أن اختيار شريك الحياة بالنسبة لها لا يعتمد على الحب أو الوضع المادي فقط، وإنما يجب أن تتوافر عدة عوامل معًا، قائلة: «الجوازة لازم يبقى عقلي وقلبي موافق عليها، ما ينفعش عقلي بس وما ينفعش قلبي بس».
