محامٍ يكشف تفاصيل قضية نفقة صغار: «الزوج تحدّى طليقته بـ4 آلاف جنيه.. فحكم القضاء بخصم 9600 جنيه من راتبه»
كشف المحامي محمد حسانين عبدالله، عبر حسابه على منصة «فيس بوك»، تفاصيل قضية نفقة صغار يتولى الدفاع فيها عن الزوجة، موضحًا أن الزوج تواصل معه هاتفيًا بعد تنفيذ حكم المحكمة بحقه، في محاولة للوصول إلى حل ودي بشأن قيمة النفقة.
وقال المحامي إن المحكمة قضت للزوجة بنفقة للصغار بنوعيها بقيمة 9 آلاف جنيه، بالإضافة إلى 600 جنيه بدل فرش وغطاء، بإجمالي 9600 جنيه شهريًا.
وأوضح: «أحد الأزواج اللي أنا ماسك قضية نفقة صغار لزوجته، يعني هو خصمي في القضية، تواصل معايا تليفونيا عشان يحل معايا بشكل ودي بعد ما تم تنفيذ حكم المحكمة بالنفقة عليه، المحكمة حكمت ضده بنفقة للصغار بنوعيها بمبلغ وقدره 9000 جنيه، بالإضافة لمبلغ 600 جنيه بدل فرش وغطاء، يعني إجمالي النفقة اللي المحكمة حكمت بها 9600 جنيه».
تابع: «في البداية خالص، أول ما زوجته جات لي المكتب عشان أرفع لها قضية النفقة لصغارها، قلت لها: طيب اديني رقم تليفونه يمكن نتوصل لحل ودي وبالفعل تواصلت مع الزوج، واقترحت عليه إننا بدل اللجوء للقضاء، إيه رأيك نقعد ونتكلم ونكتب عقد اتفاق ملزم للطرفين؟ هو من حيث المبدأ مكنش عنده مانع، بس كانت شروطه للتفاوض تعجيزية، عايز يدي نفقة لثلاثة صغار 4 آلاف جنيه، ومالوش دعوى بأي مصاريف أخرى».
استكمل: «فقلت له: يا راجل، ده كلام؟ يعني وإنت عايش معاهم كنت هتصرف عليهم المبلغ ده؟ يعني إنت حاطط لكل عيل 1300 جنيه تقريبا في الشهر، يعني في اليوم 40 جنيه للطفل الواحد، دول أكل ولا لبس ولا بامبرز ولا علاج ولا إيه بالضبط؟ اتكلمت معاه كتير، مفيش فايدة، وكمان كان رافض مطلقًا إن العقد يتكتب فيه زيادات سنوية يعني بعد 10 سنين يفضلوا هما هما الـ4000 جنيه».
تابع: «زوجته بقى، اللي هي موكلتي، كانت راضية بـ6000 جنيه، مع إني برضه شايف إن المبلغ قليل، بس هي حرة، اقترحت عليه الـ6000، وبرضه رفض ومصمم على 4000، ويا كده يا المحكمة قدامكم، وريني هتاخدي إيه بالمحكمة مع العلم إنه ميسور الحال، وبيشتغل في إحدى الجهات الحكومية المعروف عنها مرتباتها العالية والمحترمة».
وقال: «طبعا بسبب تعنته وشروطه التعجيزية، فشلنا في الحل الودي، وتم اللجوء للقضاء، والمحكمة حكمت بنفقة للثلاثة صغار مبلغ 9600 جنيه، طبعا ده بعد ما تم إثبات دخله من جهة عمله، وغير الحكم، من حقها كمان كل سنة ترفع زيادة نفقة، هو كمان مفكر إننا مش هنعرف ننفذ الحكم، وإنه هيماطل بقى.. بس لأنه موظف عام، نفذنا الحكم من جهة عمله على طول».
تابع: «يعني بيتم استقطاع المبلغ المحكوم بيه وجهة عمله تعطيه للزوجة، وهو ينزله باقي راتبه بعد الخصم، النهارده هو فوجئ وهو بيصرف الراتب إنه ناقص مبلغ 9600 جنيه، وفهم من شؤون العاملين إن ده تنفيذ حكم النفقة، فبيتصل بيا عشان نحل ودي».
اختتم: «يا راجل، قول كلام غير ده! إنت اللي لم تتقِ الله في المبلغ اللي إنت كنت عايز تدفعه رغم قدرتك ويسارك، بتعاند على حساب أولادك، للأسف، اتقفل الحل الودي، والقضاء قال كلمته خلاص».
