الفريق مهاب مميش: عندي حفيد مبيتكلمش.. وده سبب إن عملت مركز لعلاج ذوي الهمم
استعرض الفريق مهاب مميش رئيس هيئة قناة السويس الأسبق، محطات بارزة من مسيرته التي امتدت لعقود، متحدثا عن نشأته العسكرية، ودور أسرته في غرس قيم الانضباط، ورحلة كفاحه داخل القوات المسلحة، إلى جانب ذكرياته عن قيادة القوات البحرية وهيئة قناة السويس، ورؤيته لقيمة العمل والانتماء لمصر.
مميش: نشأت في أسرة عسكرية بالكامل
وتحدث “مميش"، خلال لقاء مع الإعلامية ريهام سعيد، عبر قناة “النهار”، عن نشأته في الإسكندرية، موضحا أن أسرته كانت عسكرية بالكامل، قائلا: «اتولدت في إسكندرية.. العيلة كلها عيلة عسكرية، فاتولدت في بيت منضبط وبيت عسكري منظم.. وكان أبويا بيحبنا قوي، لكن كان بيخاف علينا جدا إن إحنا نروح يمين أو شمال».
وأضاف: «الخروج بميعاد، والرجوع بميعاد، والمذاكرة بميعاد، وده رسخ فينا الانضباط»، وأشار إلى حزم والده قائلا: «كان حاسم جدا بعينيه بس، يبص لنا البصة كلنا نفهمها على طول».
قصة حب من الجيران
وعن قصة زواجه، كشف مميش أنها بدأت من الجيرة، قائلا: «هي جارتي ونفس الشارع معايا.. كانت المشكلة إن هي أخواتها 6 بنات وما فيش ولاد، إلا ولد واحد».
وتابع: «خطبتها وهي في ثانية ثانوي.. خدت معايا ثانوية عامة.. أنا أكبر منها بـ6 سنين، واتجوزنا وخلفنا وهي في أولى جامعة».
وعن بداية حياتهما معا قال: «لذة الكفاح والمثابرة بتبقى في الوقت ده. لما أكون جايب شوكة ولا سكينة كنا بنبقى سعداء إن إحنا جبنا حاجة. بنينا نفسنا مع بعض».
وأكد: «الرضا ده أهم حاجة. الإنسان لما بيموت: النفس المطمئنة ارجعي لربك راضية مرضية».
الـ2000 دولار جات في وقت وجبة واحدة
وسرد مميش موقفا من بدايات حياته، قائلا: «كنا قاعدين أنا وزوجتي ومعانا اللي يقضي وجبة واحدة، بتقول لي هنعمل إيه؟ قلت لها خليكي مع الله ربنا هيفرجها».
وأضاف: «الجرس ضرب لقيت واحد بيقول لي: أنا من طرف أخ عايش في إيطاليا، بعت لك جواب.. فتحت الجواب لقيت 2000 دولار.. ده كان حلاوة الجواز»، وتابع: «طلعت ألبس لقيت في جيب البنطلون حوالي 25 جنيه كنت ناسيهم. فربنا هو الرزاق الكريم».
«حفيده ملاك».. قصة مركز ذوي الاحتياجات الخاصة
وعن أسرته قال مميش: «عندي فاطمة دكتورة أسنان، وأميرة دكتورة صيدلة، وعندي 7 أحفاد وتحدث عن أحد أحفاده قائلا: «في حفيد فيهم ربنا أراد إنه يبقى تعبان شوية.. احتياجات خاصة.. وهو ملاك».
وأضاف: «عشان كده عملت مركز لذوي الاحتياجات الخاصة.. مش عشانه، عشان كل اللي زيه.. ده أعظم عمل في الدنيا».
السر في 54 سنة جواز: سرك ما يطلعش بره باب بيتك
وقدم مميش نصيحته للشباب عن الحياة الزوجية قائلا: «أهم حاجة سرك ما يطلعش بره باب بيتك. اختلف زي ما تختلف، يا هتناموا متصالحين يا الموضوع جوه».
وأضاف: «أوعى تدخل حد في حياتك.. أنت ومراتك هتغفروا لبعض، لكن غيركم مش هيغفر لكم».
