إسماعيل يوسف يكشف كواليس شنط أموال عبد الله السعيد وحقيقة رحيل زيزو

كشف إسماعيل يوسف عن كواليس توقيع عبد الله السعيد لنادي الزمالك في الواقعة التي عرفت بـ "صفقة القرن". 

وأكد تيجانا في بودكاست  "جيت للشاطر" مع إسلام الشاطر، أن التخطيط للصفقة استغرق 3 أشهر كاملة مع المستشار مرتضى منصور وأحمد وأمير مرتضى.

وقال يوسف: "عبد الله كان لعيب كبير ومخلص عقده مع الأهلي، قعدت معاه 3 مرات وفي المرة الثالثة حصلت المكالمة مع المستشار مرتضى"، مضيفا: "يوم التوقيع عبد الله كان وشه مزنوق وقلقان، فخدته على جنب وقلت له لو مش عاوز تمضي مفيش مشكلة إحنا بنحبك وشاريينك، لكنه وافق ومضى، والفلوس فعلا كانت موجودة في شنط 40 مليون جنيه وده كان حقه لتأمين مستقبله".

وانتقل تيجانا للحديث عن أزمات اللاعبين الحالية مثل إمام عاشور وزيزو، موضحا الفارق بين الحالتين: "جمهور الزمالك زعلان من زيزو أكتر من إمام، لأن زيزو كان بيحلف إنه مكمل وعمل حركات بينت إنه باقٍ وفي الآخر مشي بطريقة ضايقت الناس، عكس إمام اللي مشي عشان يحترف بره والظروف المادية للنادي وقتها كانت صعبة".

واختتم يوسف حديثه برؤيته لمستقبل الزمالك، مؤكدا ضرورة بناء شركة كرة قدم والاعتماد على قطاع الناشئين، مشيدا بتجربة معتمد جمال والناشئين الذين أنقذوا النادي في ظروف صعبة، قائلا: "الزمالك لازم يرجع لأصوله، والناشئ هو اللي بيحس بقيمة التيشيرت أكتر من أي حد جاي من بره عشان الفلوس".

كما أثنى على المدربين المصريين، مؤكدا أن حسام حسن ومعتمد جمال وعلي ماهر هم مستقبل التدريب في مصر.

واستعاد إسماعيل يوسف ذكريات التأهل التاريخي لمونديال إيطاليا 1990، واصفا الكابتن محمود الجوهري بأنه "أب وأخ وصديق ومدرب سابق عصره". 

وروى تيجانا في بودكاست  "جيت للشاطر" مع إسلام الشاطر، تفاصيل الرحلة الشاقة من مباراة الجزائر الفاصلة في القاهرة وصولا لمواجهة عمالقة العالم في إيطاليا.

وقال يوسف عن الجوهري: "الجوهري كان أول واحد يستخدم التحليل الفني بالفيديو، كان بيجيب شرايط فيديو محمول ويفرجنا على اللعيبه اللي هنلعب قصادهم وإحنا في الطيارة". 

وعن طرائف المعسكرات، روى يوسف قصة الكابتن طلعت منصور مع الجوهري قائلا: "الجوهري كان عاوز يطور طلعت منصور هجوميا، فكان بيخليني أعمله أوفرات من نص الملعب وطلعت يستلم بصدري ويلف يشوط، بس الكورة كانت بتطير منه 10 متر، والجوهري في الآخر قاله: يا طلعت خلاص سيبك من الشوط وخليك زي ما أنت زهقتني".

كما تحدث عن مباراة هولندا الشهيرة ووصفها بأنها كانت "ملحمة"، حيث واجهوا أسماءً مرعبة مثل فان باستن ورود خوليت وكومان، مضيفا: "الناس كانت مستهينة بينا، بس إحنا كنا بنلعب بروح واحدة، والجوهري زرع فينا إننا مش أقل من حد".

وعن مباراة أيرلندا التي انتهت بالتعادل السلبي الشهير، دافع يوسف عن الأداء الدفاعي قائلاً: "أيرلندا كانت بتلعب كرة إنجليزية طويلة ومنهكة، كان لازم نقفل الجيم بأي طريقة، لدرجة إن مدربهم شتمنا بعد الماتش في الممرات وقال 'دي مش كورة'، بس إحنا حققنا اللي كنا عاوزينه".