تامر أمين: الصيف عندي بيبدأ لما عمرو دياب ينزل ألبوم جديد
تحدث الإعلامي تامر أمين عن المنافسة الفنية الجديدة بين النجمين عمرو دياب وتامر حسني، بعد طرح ألبوميهما في نفس اليوم، مؤكدا أن الصيف هذا العام يشهد حالة مختلفة بوجود ألبومين لكبار نجوم الغناء في توقيت واحد.
وقال تامر أمين خلال تقديم برنامجه "آخر النهار: "هتقلولي الصيف اللي بجد بادئ والجو نار وفرن مفتوح في وشنا، هقول لكم ماليش دعوة.. أنا الصيف بالنسبالي بيبدأ لما عمرو دياب بينزل ألبوم".
وأضاف: "معنى كده البداية الرسمية والإعلان الرسمي لبداية فصل الصيف ولبس المايوهات ودقوا الشماسي إن عمرو دياب بينزل ألبوم، الهدر منزلش، المايوهات ما تنزلش".
وأوضح أن هذا الأمر اعتاد عليه الجمهور منذ سنوات، قائلا: "معروفة، معروفة، الكلام ده متعودين عليه من التسعينات".
وتابع: "بس الحقيقة إن الصيف المرة دي صفين، لأن أكيد مش متفقين، الاتنين نزلوا ألبوماتهم في نفس اليوم، الهضبة عمرو دياب ونجم جيل تامر حسني".
طرح الألبومين في يوم واحد وتشابه الظهور
وأشار تامر أمين إلى أن طرح الألبومين في اليوم نفسه يمثل نقطة تشابه بين النجمين، كما تحدث عن وجود تشابه في الإطلالات والصور الدعائية.
وقال: "أول وجه شبه إنهم الاتنين قرروا ينزلوا الألبوم الصيفي المسم ده في نفس اليوم".
وأضاف: "تاني وجه الشبه الكبير اللي أنتوا شايفينه في الأوتفيت، في اللوك، هات كده شيلنا الفترين هتلاقي في شبه كبير قوي قوي قوي في الأوتفيت".
وتابع: "الاستايل بتاع عمرو دياب قريب قوي من الاستايل بتاع تامر حسني، وتحس إنه تقريبًا نفس الاستايليست هو اللي أشار عليهم بصورة البوستر تبقى عاملة كده".
وأوضح أن الفرق بين الظهورين بسيط، قائلًا: "لكن غير كده تقريبًا الاتنين واحد، والأوتفيت واحد، والألبوم مين نزله في يوم واحد".
تامر أمين عن ألبوم عمرو دياب: يحتاج وقتا للاستماع
وتحدث تامر أمين عن ألبوم عمرو دياب، مؤكدًا أن أغانيه تحتاج إلى الاستماع أكثر من مرة حتى يتم الحكم عليها.
وقال: "أنا عارف إن ألبوم عمرو دياب عامل زي السجادة الإيراني، حد فاهم أنا قصدي إيه؟".
وأضاف موضحًا: "السجادة الإيراني الحريري المحترم بتاعهم كل ما تقعد تحلى وتغلى، أغاني عمرو دياب كده".
وتابع: "تسمعها أول مرة تقول إيه ده؟ إيه اللي مغني عمرو ده؟ مش قوي، مش عاجباني، الأغنية مش داخلة معايا، مش جاية معايا. تسمعها تاني يوم تلاقيك استلطفتها أكتر، تسمعها تالت يوم تلاقيك قربت لها أكتر، رابع يوم حفظتها، خامس يوم عملت ترددها".
وأوضح أن هذا الأسلوب كان حاضرًا في تجربة عمرو دياب على مدار سنوات طويلة، قائلًا: "ده كان طبعًا على مدار سنين طويلة جدًا".
ملاحظات على اختيارات عمرو دياب الغنائية
وأشار تامر أمين إلى وجود بعض الأغاني في ألبوم عمرو دياب لا تشبه أسلوبه المعتاد، موضحًا أنه يرى أن ذلك ربما يكون بهدف الوصول إلى شرائح جديدة من الجمهور.
وقال: "في بعض الأغاني أنت شايفها مش شبه عمرو دياب، مش شبه عمرو دياب".
وأضاف: "بمعرفتي بشخصية عمرو دياب وطريقة التفكير والمنتاليتي المحترمة جدًا، ودي سبب في بقائه على القمة سنوات طويلة جدًا، متهيأ لي والله أعلم إن السبب الرئيسي في اختيار عمرو دياب لمجموعة الأغاني دي اللي هي شوية مش لونه أو شوية مش شبهه، إنه عايز ينزل شوية لطبقات شعبية مختلفة".
وتابع: "اللي هم بيروحوا يسمعوا المهرجانات ويسمعوا الأغاني الشعبية، فهو يقول أنا كمان عايز الفئة دي، عايز الشريحة دي".
كما تحدث عن بعض الكلمات في إحدى الأغاني، قائلًا: "في أغنية زي بتاعة إيه البنات يا ولا، مش عارف، مش فاهم يا عمورة يعني إيه شبه البنات، شبه البنات دي حلوة ولا وحشة؟".
تامر أمين: تامر حسني قدم ألبوم مختلف
وعن ألبوم تامر حسني، قال تامر أمين إنه يحمل طابعًا مختلفًا، ويركز أكثر على المشاعر والأحاسيس.
وقال: "على الجانب الآخر تامر عامل ألبوم مختلف كمان، وفي الهادي منه، على رأي العوض كده طريقة كلام العوض يقولك في الخفيف منه في الحنين منه".
وأضاف: "ده بقى تامر حسني عمل ألبوم في الهادي منه، في الهادي منه يعني مودي الألبوم أكتر رايح لفكرة المشاعر والأحاسيس".
وتابع: "طالما بتاع صوت، فهو عمل حاجة مختلفة شوية في الدوشة بتاعت الصيف وأغاني الصيف، وعمل كمان أفكار مختلفة شوية، وهي دي طريقة تامر".
وأوضح إعجابه بطريقة تامر حسني في اختيار الأغاني، قائلًا: "أنا بحب طريقة تامر دايمًا في التفكير، إنه بيدور على الأغنية اللي فيها حكاية، اللي فيها حدوتة، مش اللي فيها مصطفى حدوتة، اللي فيها حدوتة وفيها قصة".
