شبيها مبابي وميسي: جمعنا فريق كامل يشبه اللاعبين وناقصنا كريستيانو رونالدو

كشف "شبيه مبابي" عن قصة تجميع فريق كامل يشبه لاعبي كرة القدم في مصر، مؤكدا أن الفكرة بدأت بعد كأس العالم 2022 وتحولت إلى "ترند" واسع، مطالبا بظهور "شبيه كريستيانو رونالدو" ليكتمل الفريق.

الفكرة بدأت بتحدي من شبيه أليسون بعد كأس العالم 2022

قال شبيه مبابي عن بداية الفكرة: أنا كنت في كأس العالم 2022 في قطر، وأليسون بعت لي فيديو وقال: أنا أتحدى شبيه مبابي لما أجي من كأس العالم وأعمل معاه تحدي، وإن شاء الله هكسبه.. فعمل معايا الفيديو ونزلته عندي، وعمل ترند قوي جدا.. الناس كانت بتقول: إيه ده؟ أنت جبت شبيه أليسون منين وإزاي؟ ومن هنا الموضوع بدأ، واتحمست له أكتر”.

جمعنا الفريق كله.. ناقصنا بس كريستيانو

وعن باقي أعضاء الفريق قال: هو مش بس ميسي ولا أليسون، عندنا فان دايك ودي ماريا وكامافينجا وفينيسيوس ولاعيبة كتير جدا، وكمان دياز ورافينيا. إحنا جمعنا تقريبا كل اللاعيبة، ومش ناقصنا غير كريستيانو. وبصراحة قدام الجمهور بقول إن شاء الله شبيه كريستيانو هيكون معانا قريب، بس المصنع متأخر شوية في تصنيعه. أنا موصي عليه، أعمل إيه؟ مش لاقيه. مصر ولادة وطلعت أشباه اللاعيبة كلها إلا كريستيانو."

واستعرض أسماء الفريق قائلا:  “أنا جايب أخويا شبيه أليسون، وشبيه رافينيا، وميسي، وبنزيما، وبيليه، وبيلينجهام، وفان دايك”.

الناس بتناديني ميسي في الشارع

وتحدث "شبيه ميسي" عن اكتشاف الشبه بينه وبين النجم الأرجنتيني، قائلا: “تقريبا من سنتين، كنت ماشي في الشارع رايح كافيتيريا، لقيت الناس بتتصور معايا. استغربت وسألتهم ليه؟ قالوا لي: أنت شبه ميسي ولازم نتصور معاك. ومن أول نظرة، خاصة من بعيد، ناس كتير كانت بتفتكر إني ميسي الحقيقي”.

وأضاف: في البداية ما كنتش واخد بالي، لكن لما طولت دقني شوية الشبه زاد. وبعد ما الموقف اتكرر مرة واثنين وثلاثة، بقيت أبص في المراية وأقول فعلا فيه شبه.. اعتبرتها فرصة حلوة، ومنها بدأت المشوار".

وعن تعامل الناس معه قال: "في ناس في حياتي اليومية ما بقوش ينادوني باسمي، بينادوني ميسي. حتى الأطفال بيقولوا: عايزين نتصور مع ميسي. وأنا ما بحبش أزعل أي طفل.. وفي ناس كتير، خصوصا اللي مش متابعين الكورة قوي، أول ما يشوفوني بيفتكروا إني ميسي الحقيقي، ويقولوا: ميسي إيه اللي جابه مصر؟".

منافسة شريفة.. وواثق إني هاخد كأس العالم

وعن المنافسة بين أشباه اللاعبين، قال شبيه مبابي: “المنافسة بينا شريفة، ولو بتسألني عن تحضيرات المونديال، فأنا جاهز دائما، وواثق إني هاخد كأس العالم”.

وعن المقارنة مع كريستيانو رونالدو قال: “أنا بعشق كريستيانو جدا. ولو الناس قالت تسيبوا رونالدو ياخد كأس عالم مرة، ممكن أقعد احتياطي، لكن من غيري يعني؟ أنا مش طماع”.

التيشيرت أهم حاجة.. وليا الشرف

من جانبه، قال شبيه ميسي عن استعداده للمشاركة: “أي تيشيرت أهم حاجة بالنسبة لي، أول ما أبص في المراية وأشوفه بحس إنها بداية خير.. واتعرفت على الشباب، وليا الشرف إني قابلتهم، وبدأنا المشوار وصورنا مع بعض، وكانت أيام فعلا حلوة”.