محمد التاجي يكشف سبب تفكيره في الاعتزال: مش لاقي تقدير بس محبة الناس بترضيني
حل الفنان محمد التاجي ضيفا على برنامج «الستات» عبر قناة النهار، إذ تحدث عن أسباب تفكيره سابقا في الاعتزال، كاشفا تفاصيل معاناته من غياب التقدير في الوسط الفني، مؤكدا أن حب الجمهور كان سببا في تراجعه عن الفكرة.
تحقيق نبوءة نور الشريف
وقال محمد التاجي خلال اللقاء: «أنا الحمد لله يا رب، ونبوءة قالها لي الله يرحمه نور الشريف اتحققت، قال لي: إنت لما تكبر أدوارك هتبقى أحلى بكتير من الأدوار اللي بتعملها دلوقتي».
وأوضح أن سبب كتابته منشورا عن الاعتزال لم يكن بسبب قلة العمل فقط، ولكن بسبب ظروف العمل نفسها، قائلا: «التقدير الأدبي والتقدير المادي، والأجواء اللي بيتم فيها التصوير، أنا مش حاسس إني مقدر لا أدبيا ولا ماديا وده اللي مزعلني».
محبة الناس هي اللي بترضيني
وأضاف: «بعد البوست ما اتغيرش حاجة، لكن محبة الناس هي اللي بترضيني وبتخليني أتراجع، لازم أتراجع لأن أنا ما أعرفش أعمل حاجة غير ده».
وتابع التاجي أنه لا يستطيع الابتعاد عن الفن، موضحا: «أنا لما بقعد في البيت ما بستمتعش، أنا بستمتع بالاستوديو، دي الهواية والمتعة الوحيدة اللي عندي».
فترة ابتعاده عن العمل
وكشف عن موقف حدث معه بعد فترة ابتعاد عن العمل، قائلا: «عملت مسلسل العتاولة وقعدت بعدها سنتين ما بشتغلش، لحد رمضان اللي فات، كلمني الأستاذ علي حسن وقال لي عندي دور ضيف شرف، قولتله هعمله يا علي من غير ما أقراه، استغرب وقال لي مش هتقرا الأول؟ قلت له لا، لأني كل ما بقرا برفض».
علاقته بالتمثيل بدأت منذ فترة الدراسة
وعن بدايته في الفن، أوضح محمد التاجي أن علاقته بالتمثيل بدأت منذ فترة الدراسة، وكان لجده الفنان الراحل عبد الوارث عسر دور في ارتباطه بالفن، قائلا: «كنت بقرا له الاسكربتات لأنه كان نظره ضعف، وكنت أقعد أقرا له، وعجبتني اللعبة إن كلام مكتوب في ورق يتحول لموضوع وشخصية وأحاسيس».
تأثير المرض عليه
وتحدث التاجي عن تأثير المرض عليه، قائلا: «المرض خلى الموضوع بقى قدري، اللي عايزه ربنا هيكون، وبقى في رضا أكتر».
وأشار إلى أن اهتمامه أصبح أكبر بعائلته بعد زواج بناته، قائلا: «بناتي اتجوزوا وخلاص، كل واحدة في بيتها وربنا ساترها مع جوزها، ومراتي الحمد لله أنا وهي متفاهمين».
كما كشف عن موقف صعب يتعلق بميراث والده، قائلا: «الحاج عبد الوارث عسر، أنا ورثي من أبويا ضاع عشان أمنت ناس تانية كانوا مفروض في رقبتي، فأمنت لهم ورثهم وورث أبويا ضاع في السكة».
