مصطفى شوبير: الاحتراف حلم أي لاعب.. والأهلي صاحب القرار النهائي

أكد مصطفى شوبير، حارس مرمى النادي الأهلي، أن الاحتراف الخارجي يمثل حلما لأي لاعب، لكنه شدد على أن أي خطوة مستقبلية ستكون بالتنسيق الكامل مع إدارة النادي الأهلي، احتراما للعقود المبرمة بين الطرفين.

الاحتراف مهم.. لكنني لاعب في الأهلي

وقال شوبير، خلال لقاء مع الإعلامي عمرو أديب: "ناس كتير، وأنا منهم، شايفين إن الاحتراف بره حاجة مهمة جدا لأي لاعب، لكن في الآخر أنا بلعب في نادي كبير، النادي الأهلي، ولسه عندي عقد سنة مع النادي".

وأضاف: "أي حاجة هتحصل، أو أي قرار، هيبقى بالتشارك مع النادي الأهلي".

وعن وجود عروض احتراف، أوضح: "الحاجات دي بتبقى مع الوكيل، وأنا فعلا معرفش. أول ما خلصت البطولة قلت لكل الناس اللي حواليا: يا جماعة أنا محتاج 3 أو 4 أيام أفصل فيهم عن أي حاجة".

وأضاف: "أكيد فيه ناس بتسأل، لكن معرفش إذا كان فيه عرض رسمي ولا لأ، ومعتقدش لسه إن فيه عرض".

الأهلي أولا

وشدد شوبير على أن أي خطوة مستقبلية ستكون بالتنسيق مع ناديه، قائلا: "في الأول وفي الآخر أي حاجة هتحصل هتبقى عن طريق النادي الأهلي، وهنقعد مع النادي ونتكلم ونشوف إيه الصح، واحترام العقود والأصول والمبادئ موجود".

الاحتراف حلم.. لكن حسب العرض

وعند سؤاله عما إذا كان يرغب في الاحتراف، قال: "مين ما نفسوش في الاحتراف؟ أكيد دي حاجة مهمة جدا وكبيرة جدا".

وأضاف: "لكن في الأول وفي الآخر على حسب فين، وعلى حسب طريقة اللعب، وعلى حسب العرض، وقبل كل ده رأي النادي الأهلي".

وأوضح حارس الأهلي أن الفترة الماضية لم تسمح بمناقشة ملف الاحتراف، قائلا: "إحنا خرجنا من البطولة ودخلنا على المنتخب على طول، وبعدها كان عندنا معسكر حوالي 45 يوم، فما كانش فيه وقت نتكلم في أي حاجة".

إشادة الإعلام الأجنبي

وخلال الحوار، أشار الإعلامي عمر ربيع ياسين إلى أن عددا من المعلقين الإنجليز أشادوا بمستوى مصطفى شوبير خلال البطولة، مؤكدين أنه يستحق الاحتراف في أحد الأندية الأوروبية.

ورد شوبير قائلا: "دي حاجة كبيرة قوي، وفضل من عند ربنا في الأول وفي الآخر، الواحد بيجتهد وبيحاول يعمل اللي عليه".

ربنا كرمني كرم كبير

واختتم مصطفى شوبير حديثه قائلا: "فكرة إن ربنا يكرمك بمكافأة زي دي، وإن العالم كله يشوفك، دي حاجة هفضل أحمد ربنا عليها من هنا لآخر عمري، لأن بجد ربنا كرمني كرم كبير قوي فوق ما كنت أتخيل".