مصطفى شوبير: والدتي وهبت حياتها لينا.. ووالدي كان مبسوط بمشاركتي في المونديال
كشف مصطفى شوبير، حارس مرمى النادي الأهلي، كواليس الدعم الذي تلقاه من أسرته خلال مشاركته في بطولة كأس العالم، مؤكدا أن والده الإعلامي أحمد شوبير كان حريصا على دعمه نفسيا أكثر من تقديم النصائح الفنية.
وقال مصطفى شوبير إن والده كان سعيدا للغاية بمشاركته في البطولة، مضيفا: "كان مبسوط جدا، وأنا كنت عارف قد إيه هو مبسوط من غير حتى ما يوصللي ده. فكرة إنك بتلعب كأس عالم وهو لعب كأس عالم، وإن اسم العيلة لسه بيتردد، دي حاجة كبيرة جدا، وأنا كنت مبسوط إنه هو مبسوط، وإني شرفته أنا وأبويا وأمي".
وأشار إلى الدور الكبير الذي لعبته والدته في دعمه، قائلا: "أمي ليها دور مش طبيعي معايا، كانت عاملالي بروتكشن من الناس، أي حد عايز يكلمني في أي حاجة قبل الماتش كانت تمنعه. محدش يعرف ده غير الناس القريبين، وهي مع أبويا وأخواتي والعيلة كلها كانوا أكبر دعم ليا".
وأضاف: "هي ست وهبت حياتها كلها لنا، كل حاجة في حياتها بقت معمولة لولادها ولجوزها ولعيلتها، وده أقل حاجة أقدر أقولها عنها".
وخلال الحوار، استعاد الإعلامي إبراهيم فايق موقفا من بدايات أحمد شوبير في الإعلام، قائلا إن والدة مصطفى كانت تنتظر زوجها داخل السيارة لساعات في الحر والبرد حتى ينتهي من عمله، وهو ما علق عليه مصطفى قائلا: "لغاية دلوقتي ممكن تعمل نفس الحاجة لو مفيش حد موجود".
نصائح كابتن شوبير لابنه مصطفى
وعن النصائح التي كان يتلقاها من والده قبل المباريات، أوضح مصطفى شوبير: "هو دايما بيقولي: أنت عارف أنت بتعمل إيه، وأنا سايبك، أنا بس ببص عليك من بعيد، ولو حسيت إن في حاجة هتلاقيني بتكلم معاك".
وأضاف: “هو طبعا بيتكلم معايا على طول، لكن ليه كلمة معروفة، قبل أي ماتش دايما يقولي: "استمتع".
وكشف أنه لم يكن مقتنعا في البداية بهذه النصيحة، قائلا: “أنا اعترضت على كلمة "استمتع”، خصوصا يوم ماتش الأرجنتين، حسيت إن معناها إن خلاص روحوا استمتعوا، لكن هو كان يقصد حاجة تانية".
وتابع: "هو كان يقصد إنك تبقى مبسوط بالحاجة اللي بتعملها، وإنك تنزل من غير ضغوط، لأن علم النفس بيقول إن لما تبقى مستمتع بالحاجة اللي بتعملها هتقدر تقدم أفضل أداء".
واختتم مصطفى شوبير حديثه قائلا: "أنا كنت دايما عندي طموح كبير، لكن في النهاية الطموح والاستمتاع بالحاجة اللي بتعملها مفيش بينهم أي تعارض، بالعكس الاتنين بيكملوا بعض، وبيساعدوك توصل لأحسن أداء".
