أحمد زاهر يحسم الجدل حول خلافه مع محمد رمضان في «البرنس»: مشوفتش منه حاجة وحشة
حسم الفنان أحمد زاهر الجدل الذي تردد خلال السنوات الماضية بشأن وجود خلاف بينه وبين الفنان محمد رمضان أثناء تصوير مسلسل البرنس، مؤكدا أن العلاقة بينهما كانت جيدة طوال فترة العمل ولم يشهد أي موقف سلبي من جانبه.
عمري ما أذيت محمد رمضان
وقال أحمد زاهر، خلال ظهوره في بودكاست «المشهد»: «عمري ما أذيت محمد رمضان، أنا مثلت الدور اللي اتكتبلي واتقالي واتوجهت من الأستاذ محمد سامي ومثلت، أنا معملتش حاجة غلط».
وأضاف: «الناس بقى حبت الشخصية وانبهرت بيها، دي بقى بتاعة ربنا، ومحمد رمضان مقاليش أي حاجة، بالعكس كنا لذاذ جدا مع بعض، ولحد النهارده علاقتنا كويسة بس مش بنتقابل ومش بنتكلم ومشوفتهوش من وقتها يمكن مرة اتقابلنا وإحنا رايحين نستلم جايزة سلمنا على بعض ومفيش حاجة ما بينا بالعكس».
كواليس تصوير مسلسل البرنس
وأكد زاهر أن الأجواء داخل كواليس تصوير مسلسل «البرنس» كانت يسودها الاحترام والتعاون، قائلا: «طول ما إحنا بنصور البرنس أنا عمري مشوفت منك يا محمد رمضان أي تصرف وحش أو تصرف يضايق، بالعكس انبسطت جدا بالشغل معاه».
وتابع: «إحنا الاتنين عملنا مشاهد حلوة أوي وكيميتنا ركبت بسرعة، وكان محترم جدا معايا في اللوكيشن وانبسطت جدا بالتمثيل معاه والتجربة، وإن شاء الله تتكرر، معنديش أي مشكلة».
ونفى أحمد زاهر بشكل واضح ما تردد عن وجود خلاف أو توتر بينه وبين محمد رمضان خلال تصوير مسلسل البرنس، مؤكدا أن علاقتهما اتسمت بالاحترام المتبادل وأنه يتمنى تكرار التعاون بينهما مستقبلا.
في سياق متصل، أكد الفنان أحمد زاهر أنه يعاني باستمرار من ملاحقة البعض له ولأسرته وتصويرهم في الأماكن العامة، قائلًا: «في الشارع، وإحنا ماشيين، أو في أي مكان، حتى لو قاعدين في كافيه أو بناكل، طول الوقت فيه ناس بتصورنا.. بجد تعبنا».
انتشار الفيديوهات عبر مواقع التواصل الاجتماعي شجع البعض على استغلالها لتحقيق الأرباح
وأضاف «زاهر»، خلال لقاءه ببودكاست «منا وفينا»، عبر «المشهد لايت»، أن انتشار الفيديوهات عبر مواقع التواصل الاجتماعي شجع البعض على استغلالها لتحقيق الأرباح، موضحًا: "للأسف الفيديوهات دي بقت بتعمل فلوس لبعض الناس، فبقوا ممكن يصوروا أي حاجة ويكتبوا أي كلام، زي: أحمد زاهر مات، أو أحمد زاهر عمل حادثة، وينشروا إشاعات مالهاش أي أساس".
