فريدة الشوباشي: شعرنا بمؤامرة لتفتيت مصر.. والرد كان حاسما في 30 يونيو
تحدثت الكاتبة والصحفية فريدة الشوباشي عن كيفية تغير ملامح الدولة بعد ثورة 30 يونيو، قائلة: «بحس إن أنا كمصرية أقوى من أي مؤامرات لأن دي رد على أي حاجة، مشروع الإخوان كله اتحطم في يوم 30 يونيو، إنتوا عملتوا، وقاعدين تعملوا وتفرقعوا وتهددونا وتعملوا على القدس رايحين شهداء بالملايين مراحش منهم واحد حتى، يعني كل دول إحنا اكتشفنا ده بس الحكاية إن الحس المصري الجمعي يعني أنا قريت في وكالة الأنباء الفرنسية اللي هي قالت ما بين 35 لـ40 مليون دي أكبر تجمع بشري في التاريخ».
بصمة قوية في التاريخ
وأضافت الشوباشي، خلال لقاءها عبر فضائية «إكسترا نيوز»: «إحنا عندنا حاجات من حيث التاريخ دايما بنبقى لينا بصمة فيها، فأنا نزلت شاركت في ثورة يونيو، كنت نزلت أنا وابني وحفيدي 3 أجيال، ولقينا الثلاثة أجيال في الميدان بردو في ميدان التحرير يعني ناس عواجيز زي حالاتي كده وناس زي ابني وناس زي حفيدي كان عنده 17 سنة، شوفي بقى لما الإحساس يبقى موحد بين 3 أجيال دي بينفرد بيها الشعب المصري ».
يافطة كده إن أنا لازم أموت
وتابعت فريدة الشوباشي: «حطيت في يافطة كده إن أنا لازم أموت، إحنا كلنا حسينا إن في مؤامرة خطيرة لتفتيت مصر وإهداء أجزاء منها مش عارف لمين وأجزاء لمين ودي محصلتش ده إحنا الدولة اللي بيسمونا فجر الضمير، إحنا من فجر التاريخ وإحنا مصر وهنفضل إن شاء الله إلى يوم الدين وإحنا مصر بردو فدي كانت مؤامرة والرد بتاعنا عليها كان حاسم والرد ده لازم يردع اللي عندهم أي أفكار أو أي نوايا لتفتيتنا، واللي بيمولوهم يعني كده خدوا صفعة على وجوههم إنه مفيش ليه 5 آلاف نزلوا وقالوا لا عايزين الإخوان».
محاربة الفن والثقافة
وواصلت: «احنا قولنا لا إحنا مصر إحنا لازم نسترجع مكانا ومكانتنا يعني قعدوا يحاربوا الثقافة والفن وإن كل فن حرام، وعملوا عمايل يعني عشان يخلونا دولة درجة ثالثة ولا حاجة كده، إحنا قومنا وقولنا لا، إحنا مصر وإحنا زي ما أنا دايما بقول لما الرئيس عبد الفتاح السيسي كان وزير دفاع وقتها قولت القلوب شاورت عليه بس مجرد وشه وصدق إحساسنا بصدق تعبيراته لما اتكلم عن إن مصر محدش هيقدر يعمل فيها حاجة ومصر معانا، وإحنا مصريين واللي هيقرب لمصر هشيله من على وش الأرض فإحنا وثقنا فيه لا عن طريق حزب ولا عن طريق دعاية بالإحساس».
الرئيس السيسي مصري أصيل
واختتمت: «الرئيس السيسي مصري أصيل وأول حاجة قالها وأنا قولت نعم السيسي رئيسي، أول ما شوفت العبارة دي اللي هي إن الإرادة المصرية لن تعلو عليها إرادة أخرى، وإحنا من ساعتها بقالنا 13 سنة شايفين كده حد قدر يخلينا نعمل اللي هم عايزينه؟، لا».
