لقاء الخميسي: أنا عصبية جدا ومرة عيطت 3 أيام بسبب ابني
كشفت الفنانة لقاء الخميسي، عن سر خطير في شخصيتها وهو أنها عصبية للغاية، قائلة: «أنا عصبية جدا.. دلوقتي بحاول أسيطر على نفسي.. لما بقيت ألعب رياضة بزيادة الموضوع بقا هادي أكتر».
وأضافت، خلال استضافتها في برنامج «أسرار» المذاع عبر شاشة النهار، مع الإعلامية أميرة بدر: «معظم المواقف اللي بعبر فيها عن غضبي الشديد كان مع ابني الكبير لأن هو أكتر واحد ممكن يعصبني وببقى مجنونة ومش بميز يعني بتعصب واحدفه في وشه بأي حاجة جنبي.. في مرة اتعصبت عليه جامد وبقيت أضربه وهو مسك إيدي وأنا بضربه وثبتني وقعدت أعيط 3 أيام علشان صعبت عليا نفسي».
وأوضحت أن زوجها حل الأمر، قائلة: «أوسا حل الموضوع ورجع باس راسي.. دي كانت المرة الوحيدة اللي كان دمها تقيل.. وأنا تفهمت إن هو اتعصب علشان هو مراهق وأنا اتعصبت عليه».
وأكدت أنها لم يسبق لها وغضبت خلال عملها، قائلة: «مش فاكرة أي لحظة اتعصبت فيها في الشغل».
وأشارت لقاء الخميسي إلى أن زوجها شخص هادئ للغاية، عكسها تماما، مؤكدة أنه لم يسبق له أن عبر عن غضبة معها بالمشاجرة أو التطاول أو أي شكل من أشكال العنف، مضيفة: «ده مش بيزعق ده هينقطني هو مش بيزعق خالص.. بيقولي ليه أزعق ليه لما ممكن اتكلم بالراحة، وهو عنده وجهة نظر إن لو الشخص مش عايز يقتنع بالكلام مش هيقتنع حتى لو رفعت صوتي».
وفي سياق متصل، كشفت الفنانة لقاء الخميسي، أن زوجها محمد عبد المنصف، داعم لها منذ زواجهما، ولم يخيرها على الإطلاق بينه وبين عملها في الفن.
وقالت لقاء الخميسي في لقاء عبر girlzspace:"عمري جوزي ما خيرني بين علاقتي بيه وبين شغلي.. علاقتي به أهم من أي حاجة في الدنيا، والراجل اللي بيمنع أي ست عن شغلها دليل على ضعفه وعدم ثقته في نفسه، وعايز يشوفها ضعيفة عشان يحس نفسه قوي".
على جانب آخر، كانت لقاء الخميسي حذرت من نشر معلومات مغلوطة تخص حياتها الشخصية، كما حذرت من التعليقات الخارجة أو التنمر عليها، مشددة أنها سوف تتعامل مع الأمر بشكل قانوني، حيث كتبت عبر حسابها بموقع فيسبوك: "انذار! أي معلومات مغلوطة وأي تعليقات خارجة عن السياق في صفحات (الفيس بوك) أو إنستجرام والتيك توك سيتم التدخل والتعامل معاها بشكل قانوني بمنتهى السرعة،محامي العائلة".
