محمود الليثي: عمرو دياب المطرب العربي الوحيد اللي لقيت له أسطوانات في المكسيك
تحدث الفنان محمود الليثي خلال لقائه مع الإعلامي عمرو أديب عن مكانة الفن المصري ونجوم الغناء في مصر، مؤكدا أن مصر تمتلك أصواتا عالمية ونجوما أصحاب جماهيرية كبيرة داخل وخارج الوطن العربي.
وقال الليثي: «عندنا أصوات في مصر عالمية، وعندنا نجومية جبارة في مصر، مصر مخ وروح، يعني مصر يا جماعة».
وأضاف أنه يتذكر موقفا حدث له خلال سفره إلى المكسيك، موضحا: «أنا رحت المكسيك وقلت أول ما أنزل أي مول هشوف فيه أسطوانة مطرب عربي، والكلام ده كان سنة 2014».
وتابع: «المكسيك دي كنت حاسس إنها آخر الدنيا، وأول ما أنزل أي مول وأسأل، رغم إنهم بيتكلموا لاتيني، كنت أقول للناس اللي معايا في الجروب: يا جماعة أنا عايز أشوف أسطوانة لمطرب عربي».
وأشار إلى أنه فوجئ بعد رحلة البحث بأنه لم يجد سوى أعمال الفنان عمرو دياب، قائلا: «والله العظيم ما لقيتش أسطوانة بره غير للهضبة عمرو دياب».
وأكد الليثي إعجابه الكبير بعمرو دياب، مضيفا: «أنا أرفع له القبعة وأقول له أنت رقم واحد في الكون ومشرفنا، والله العظيم».
واستكمل حديثه قائلا: «الهضبة دي حاجة واحدة، الهضبة بجد، الهضبة صحته فظيعة، بجد عنده صحة رهيبة، شوف سنه قد إيه وصحته عاملة إزاي، ما شاء الله عليه».
وأضاف: «الهضبة راجل بتحبه، الهضبة ما لوش حل، وعلى فكرة ما بأثرش فيه أي حاجة، الراجل بقاله سنين طويلة محافظ على نفسه وعلى نجاحه».
وخلال الحوار مازحه عمرو أديب قائلا إنه ظل سنوات يتساءل عن سر النجاح الكبير لعمرو دياب رغم التشابه في الاسم بينهما، ليرد الليثي مؤكدا أن النجاح لا يأتي من فراغ.
وقال الليثي: «أكيد هو محظوظ، لكن كمان مجتهد فوق العادي، في ناس كتير اجتهدت، لكن الهضبة عنده اجتهاد كبير جدا».
وأضاف: «في ناس كتير اشتغلت وتعبت، لكن عمرو دياب من الناس اللي ربنا اداها حظ كبير، ومع الحظ ده فيه شغل وتعب واستمرار، وعلشان كده فضل محافظ على مكانته كل السنين دي».
واختتم محمود الليثي حديثه بالتأكيد على أن عمرو دياب يعد نموذجا للنجاح والاستمرارية في الغناء المصري والعربي، مشيرا إلى أن ما حققه على مدار مشواره الفني جعله واحدا من أبرز النجوم الذين رفعوا اسم مصر في مختلف دول العالم.
