«أنت عبرة وعظة لكل زملائك».. سناء منصور تكشف أصعب موقف مرت به
كشفت الإعلامية القديرة سناء منصور عن موقف محرج للغاية مرت به خلال فترة دراستها في كلية الأداب قسم الصحافة، وقالت: «أنا روحت تدريب في أول سنه في الكلية في جريدة الأهرام.. والأستاذ محمد حسنيين هيكل أشرف على التدريب وكان بيختار أخبار تنزل في صحيفة الأهرام وأنا كنت منهم.. خلال الفترة دي بدأ يكون عندي تعالي شوية على زملائي ومبقتش أهتم بالدراسة زي الشغل».
وأضافت، خلال استضافتها في بودكاست «نقطتين وخط»: «وقتها بسبب إهمالي كنت هعيد السنة لكن في دكتور تدخل وعديت بأعمال السنة لكن كان معايا مادة واحدة بس».
وواصلت: «لما حضرت أول محاضرة مع السنة اللي أصغر مني الدكتور قالي سناء قومي أقفي.. طبعا أنا قلت هيعرف الناس بيا ويقول عليا شاطرة جدا وعظيمة واتعلموا منها.. لقيته بيقول أنا عايزكم تعرفوا سناء إنها عبرة وعظة ليكم إن الصحافة المهنية مش أهم من الدراسة».
وأكدت أنها شعرت بإحراج كبير في تلك اللحظة، كما أنها لم تنساها طوال حياتها.
وفي سياق الحلقة، كشف الإعلامية القديرة سناء منصور، عن كواليس قصتها مع كوكب الشرق أم كلثوم، قائلة: «في بدايتي كنت صوتي رفيع جدا لكن مفيد فوزي وأمل فهمي اختاروني إني أقدم أكثر برنامج جرأة في الإذاعات المصرية في شهر رمضان وحطوني في وش المدفع في برنامج كان اسمه وافق أو امتنع».
وأضافت: «كان مفيد فوزي بيكتب وأنا بقدم.. كل سؤال كنت بقوله كان بيلخص حالة وأنا مكنتش فاهمة ده.. وخلال الحلقات أكثر من مرة جبنا سيرة أم كلثوم وأنا كنت طربشة جدا وقتها».
وتابعت: «سألت الأستاذ يوسف إدريس هل يقدر إنه يمتنع عن التدخين في حفلات أم كلثوم لأنه ده كان قرار من محافظ القاهرة.. فهو رد وقال مش بحضرلها حفلات.. مرة تانية سألت الأستاذ أحمد بهاء الدين هل بعيد عنك حياتي عذاب أغنية الموسم قالي لا غلط».
وأردفت: «مكنتش فاهمة مشاكل الأسئلة دي وهي اعتبرتها حملة عليها.. وغضبت جدا وطلبت وقف أغانيها من الإذاعات المصرية والدنيا اتقلبت في مصر.. وتدخل الأستاذ محمد حسنين هيكل وحل الموضوع وحماني جدا».
وأكدت أنها حاولت التواصل معها عن طريق صديقة والدتها، مضيفة: «كلمتها في التليفون وعرفتها بنفسي إني بقدم ما يطلبه المستمعون مش وافق أو امتنع.. وطلبت منها إن أنا أرجع أنزل أغانيها تاني بعد كلام كل الناس دي عني.. وبعد محاولات كتير قالتلي أوعدك تكوني أول واحدة تذيع أغنياتي لكن بعد شوية.. ودعتني إني أشرب شاي معاها لأنها كانت مبسوطة بالمونتاج بتاعي لأغنياتها.. وبعد كل ده عرفت إنها أصلا كانت عارفة».
