«بيصطادوا في الميه العكرة».. تامر أمين يهاجم منتقدي منتخب مصر
علق الإعلامي تامر أمين عن الحديث المتداول حول أداء منتخب مصر، قائلا: «من بعد مباراة منتخب مصر مع البرازيل واللي بيحبوا يصطادوا في المية العكرة اشتغلوا، وأنا مش هقول أسماء عشان بيزعلوا مني، انتوا عارفين إني مبخافش، واللي يقول يقول، الناس بتقولي بلاش يا تامر عشان متعملش سجال شخصي».
مش وقت محاسبة المنتخب
وأضاف، خلال تقديم برنامج «آخر النهار»، المذاع على قناة «النهار»: «الحقيقة في ناس بجد تضايق، لما تبقى بعض المحليين والكباتن طالعين خلال اليومين دول اللي هو المفروض نبقى ورا منتخبنا وبندعمهم وبندعيلهم وحتى لو احنا بعنينا شايفين مشاكل أو أخطاء أكيد دا مش وقت المحاسبة».
المحاسبة تأتي بعد الأداء
وتابع: «المحاسبة تيجي بعد الأداء يعني بعد النهاية مش قبل ضربة البداية، عمرك شوفت حد بيحاسب قبل الامتحان؟، الحقيقة الكلام اللي أنا سمعته على مدار اليومين اللي فاتوا من بعض المحللين المعروفين بالاسم اللي بيفضلوا الشهرة والتريند وإنه يعمل فلفل شطة على حساب أي حاجة سواء اسم بلده أو الفتنة اللي ممكن يعملها بين الأهلي والزمالك».
أرجو إن الناس متبتلعش هذا الطعم
واختتم: «همهم الوحيد إن يبقى عندهم تريند وعندي فولورز، والناس في القنوات بيجبوني ولما أعمل فيديو على السوشيال ميديا يكسر الدنيا، وأرجو إن الناس متبتلعش هذا الطعم وتنبذ هذه الأفكار والأصوات الشاذة، دا مش وقت محاسبة ولا وقت تقطيع دا وقت دعم والمحاسبة تيجي في وقتها بعد اكتمال المشوار، نقعد نشوف كسبنا اي وخسرنا اي، دا الاحترام والإعلام والانتماء للبلد».
وعلق الإعلامي تامر أمين على أداء منتخب مصر أمام البرازيل أمس، قائلا: «امبارح كانت المراجعة النهائية بالنسبة لحسام حسن وإبراهيم حسن والجهاز الفني واللاعبين، أنا بعتبر إن احنا داخلين على امتحانات الثانوية العامة اللي هي كأس العام، وامبارح كانت المراجعة النهائية، خلاص المذاكرة خلصت يا حسام حسن».
فعاليات كأس العالم
وأضاف، خلال تقديم برنامجه آخر النهار، المذاع على قناة قناة النهار: «فعاليات كأس العالم هتبدأ كمان حوالي أسبوع، ربنا يكتبلنا فيها التوفيق، نتيجة الماتش مش مهمة هي عبارة عن امتحان تجريبي، امبارح كان ترمومتر لقياس درجة حرارة منتخبنا قدام الفعاليات الكبرى».
خطة حسام حسن
وتابع: «أنا أعرف حسام حسن جدا على المستوى الشخصي، ومش كل حاجة وضحها امبارح، فطبيعي إني مرميش كل أوراقي ومطلعش كل أسراري ومبينش كب تكتيكاتي في الملعب وإلا أبقى ببفضح نفسي، لكن التشكيلة الأساسية أبقى ساذج لو بينتها كلها للبرازيل، فأنا أعلم أن حسام حسن مازال يخبأ شيئا».
