عبلة سلامة عن أزمة الكلاب: هو اللي يصرخ أعلى هو اللي معاه الحق؟
استنكرت الإعلامية عبلة سلامة، من النقاش الأخير حول أزمة الكلاب.
وكتبت عبلة سلامة عبر حسابها بموقع فيسبوك: “هو إحنا ليه بقينا غاويين نطلع أسوأ ما فينا قدام العالم ؟!!! بجد سؤال محيرني. اللي شفته امبارح في النقاش الخاص بأزمة الكلاب كان مؤسف جدًا. المفروض إننا بنتكلم عن قضية فيها آراء مختلفة وتحتاج ناس تسمع بعضها وتحترم بعضها، لكن اللي شوفته كان شرشحة وصوت عالي واستفزاز وهجوم شخصي أكتر ما كان نقاش”.
وأضافت: "هو اللي يصرخ أعلى هو اللي معاه الحق؟ ومن امتى بقينا نعتبر الإهانة والتجريح نوع من القوة؟ فين الحوار؟ فين الاستماع؟ فين احترام الاختلاف؟
المؤلم إن الصورة اللي بتوصل للعالم مش صورة مجتمع بيتناقش وبيحاول يلاقي حلول لكن صورة ناس بتهاجم بعضها ومش مديّة فرصة لأي حد يشرح وجهة نظره أو يكمل جملة".
وأكملت: “مختلفين؟ طبيعي. متفقين؟ مش لازم. لكن هل لازم كل نقاش يتحول لمعركة؟ كفاية شرشحة علشان ترند. كفاية استفزاز علشان مشاهدات. وكفاية إننا نفضل نحط أسوأ ما فينا تحت الميكروسكوب ونقدمه على إنه هو الحقيقة كلها مصر فيها ناس محترمة تعرف تتحاور وتختلف باحترام وتقول رأيها من غير شتيمة ولا تحقير. يا ريت ده يكون اللي يظهر للناس، مش العكس!! وفي النهاية النتيجة .. لم ينجح أحد!”.
